Расейскі апазіцыянер Аляксей Навальны выйшаў са спецпрымальніка пасля 20 содняў арышту, якія ён адбываў за паўторнае парушэнне парадку правядзення мітынгаў.
Палітык напісаў аб сваім вызваленні ў Instagram.
«Дождь» паведамляе, што Навальнага вызвалілі раніцай «да прыезду журналістаў»; паводле інфармацыі тэлеканала, ён быў «вывезены ў іншае месца».
На вечар 22 кастрычніка ў Навального запланаваная сустрэча з прыхільнікамі ў Астрахані.
Аляксей Навальны быў арыштаваны 2 кастрычніка за паўторнае парушэнне парадку правядзення мітынгаў з-за заклікаў на акцыю ў Ніжнім Ноўгарадзе ў канцы верасня – акцыя спачатку была ўзгоднена, але затым мясцовыя ўлады змянілі рашэнне.
Кіраўнік федэральнага штаба Навальнага Леанід Волкаў таксама знаходзіцца пад арыштам.
Пасля арышту Навальнага яго прыхільнікі зладзілі 7 кастрычніка акцыю з патрабаваннем дапусціць апазіцыянера да ўдзелу ў выбарах прэзідэнта РФ (Цэнтрвыбаркам абяцаў не рабіць гэтага праз судзімасць Навальнага). У многіх гарадах акцыі суправаджаліся затрыманнямі.
КА, belsat.eu, паводле meduza.io
