ЦВК Расеі адмовіла ініцыятыўнай групе апазіцыянера ў вылучэнні Навальнага кандыдатам на прэзідэнта на выбарах 2018 года праз судзімасць у справе кампаніі «Кировлес».
24 снежня ЦВК прыняў у Навальнага дакументы для вылучэння на выбары.
У ЦВК заявілі, што сход групы выбарцаў у падтрымку самавылучэння блогера прайшоў у межах закона і паперы былі аформлены «пісьменна», але ён не можа балатавацца з-за непагашанай судзімасці. Паводле Канстытуцыі РФ забарона на ўдзел у выбарах на Навальнага не мусіла распаўсюджвацца, бо ён мае ўмоўную судзімасць і цяпер не ў месцы зняволення. Цэнтрвыбаркам да такіх аргументаў не прыслухаўся.
Апазіцыянер, выступаючы на пасяджэнні, заявіў, што рашэнне ЦВК парушае Канстытуцыю. Таксама Навальны сказаў, што будзе абскарджваць гэтае рашэнне ў Канстытуцыйным судзе, перадае varlmamov.ru. Палітык заявіў, што не распускае сваіх штабоў па краіне, а ператварае іх у штабы байкоту выбараў, а таксама арганізоўвае назіранне за яўкаю выбарнікаў.
Пасля рашэння ЦВК блогер апублікаваў відэа з заклікам байкатаваць выбары.
«Мы аб’яўляем страйк выбарцаў. Працэдура, у якой нам прапануюць удзельнічаць, не зʼяўляецца выбарамі. У ёй удзельнічаюць толькі Пуцін і тыя кандыдаты, якіх ён асабіста выбраў, якія не маюць для яго ніякай пагрозы», – заявіў Аляксей Навальны.
Таксама палітык напісаў у Twitter пра агульнарасейскую акцыю пратэсту супраць рашэння ЦВК. Дата акцыі пакуль не называецца.
ДР belsat.eu