Намеснік старшыні праўлення Нацбанку Тарас Надольны пракаментаваў абслугоўванне праблемнай запазычанасці банкаў.
Паводле яго, капіталу для абслугоўвання гэтай запазычанасці дастаткова.
Адказваючы на пытанне пра стрэс-тэсты, якія праводзяцца ў банкаўскай сістэме, Тарас Надольны адзначыў, што гэтая праца здзяйсняецца ўвесь час, на штогадовай аснове, у тым ліку з удзелам незалежных аўдытарскіх кампаніяў.
«На сённяшні дзень мы не можам сказаць, што стрэс-тэсты горшыя, чым летась. Разам з тым, вядома, ёсць пэўныя пытанні з пункту гледжання якасці партфеляў банкаў у частцы праблемнай запазычанасці – яна не зніжаецца на сённяшні дзень так, як нам хацелася б», – падае словы Тараса Надольнага БелТА.
Відэасюжэт «Абʼектыву» пра праблемныя запазычанасці
«Узровень праблемнай запазычанасці ў банкаўскім сектары з’яўляецца вельмі высокім і хавае ў сабе дастаткова высокія рызыкі і пагрозы для нацыянальнай эканомікі і грамадства ўвогуле», – заявіў на мінулым тыдні ў размове з «Белсатам» аналітык Businessforecast.by Аляксандр Муха.
Сёлета замежны доўг Беларусі павялічыўся на $ 2 млрд і дасягнуў гістарычнага максімуму. Адмыслоўцы не выключаюць, што ўжо налета ратаваць банкі бюджэту прыйдзецца ўласнымі сіламі. Гэта можа выклікаць шок на валютным рынку і разагнаць кошты.
Глядзіце таксама:
НМ, belsat.eu
