Як спрабавалі спыніць этнічныя чысткі Слабадана Мілошавіча мірным шляхам і чаму гэты варыянт не спрацаваў. Самай рэзананснай аперацыі NATO у гісторыі прысвечаны другі выпуск новага сезону міжнароднага ток-шоу «Тэрыторыя праўды».
24 сакавіка 1999 года авіяцыя Паўночнаатлантычнага альянсу нанесла першыя ўдары па аб’ектах на тэрыторыі Сербіі. Мэтай аперацыі «Саюзная сіла» было завяршэнне сербска-албанскага збройнага канфлікту і этнічных чыстак на тэрыторыі Косава – аўтаномнага рэгіёну са змяшаным албанскім і сербскім насельніцтвам.
У студыі «Тэрыторыі праўды» экс-міністр друку Расеі Сяргей Грызуноў, член расейскай дэлегацыі для перамоваў з Мілошавічам, называе былога кіраўніка Югаславіі «не зусім разумным чалавекам». Ён распавядае пра тое, чаму па тэлебачанні ў Бялградзе паказвалі яго партрэт і называлі ворагам Югаславіі. Расейскі палітык успамінае і пра тое, як дэлегацыя, якой ён удзельнічаў, спрабавала не дапусціць сілавога ўмяшальніцтва NATO, і чаму місія пацярпела паражэнне, а таксама чаму Расея не накіравала войска і ўзбраенне па дапамогу Белграду.
Генерал Бэн Годжэз, камандуючы арміяй ЗША ў Еўропе 2014–2017 гг. так ацэньвае тыя падзеі:
«Былі тысячы еўрапейцаў, забітых іншымі еўрапейцамі. Таксама ў выніку пачаўся крызіс бежанцаў. Гэтая нестабільнасць на Балканах патэнцыйна магла распаўсюдзіцца на іншыя часткі Еўропы. Еўрапейскія краіны і ААН паспрабавалі вырашыць праблему з дапамогай міратворчых місіяў. Яны спрабавалі вырашыць пытанне мірна, але беспаспяхова»
Дыпламатыя пацярпела паразу. Без згоды Арганізацыі Абʼяднаных нацый Альянс адважыўся на вайсковую аперацыю, якую назваў «першай у гісторыі вайной за правы чалавека». Аперацыю «Саюзная сіла» дагэтуль жорстка крытыкуе Расея, ды выкарыстоўвае яе як аргумент у супрацьстаянні з заходнімі краінамі.
Пра гэта дыскутуюць вядучыя і эксперты новага сезону міжнароднага ток-шоу «Тэрыторыя праўды», прысвечанага дваццатай гадавіне пашырэння Альянсу на Усход і 70-годдзю заснавання NATO. Праграму вядуць журналісты Віталь Портнікаў (Украіна) і Святлана Калінкіна (Беларусь).
У ток-шоу ўдзельнічаюць эксперты з чатырох краін:
Сяргей Грызуноў, былы міністр друку Расеі, пісьменнік, журналіст, прафесар, Расея.
Андрэй Цецярук, народны дэпутат Украіны, палкоўнік, камандзір добраахвотніцкага батальёна міліцыі спецыяльнага прызначэння «Міратворац», Украіна.
Павел Флэйшар, прэзідэнт Інстытуту прагназавання і міжнародных даследаванняў, эксперт у пытаннях бяспекі, Польшча.
Марус Лаўрынявічус, вядучы эксперт Віленскага інстытуту палітычнага аналізу, Літва.
На працягу сакавіка кожную сераду а 21:25 глядзіце «Тэрыторыю праўды» у эфіры нашага тэлеканала, а затым на старонцы belsat.eu і YouTube-канале Вот так.