26 студзеня па тэрыторыі краіны прайшоў снежны цыклон Ларс. Асноўны ўдар стыхіі прыпаў на Берасцейскую, Гарадзенскую і Гомельскую вобласці.
За мінулыя содні энергетыкі аднавілі электразабеспячэнне ў 1800 населеных пунктах, яшчэ ў 402 – працягваюць працу, піша tut.by са спасылкай на «Белэнерга».
Абледзянелыя і заснежаныя драты не вытрымлівалі цяжару снегу, іх таксама абрывалі, падаючы, дрэвы, што стала прычынай адключэння электралініяў.
Да аднаўленчых і рамонтных працаў прыцягнулі 1400 чалавек і 450 адзінак тэхнікі. Дзеля забеспячэння электрычнасцю сацыяльных аб’ектаў і населеных пунктаў задзеялі рэзервавыя крыніцы сілкавання.
А 6-й раніцы 27 студзеня вяліся работы дзеля ліквідацыі аварыяў у 402 населеных пунктах.
ІК, belsat.eu