Настаўнікі сярэдняй школы №3 Нясвіжа скардзяцца тэлеграм-каналу «Баста», што іх адпраўляюць на калектыўную прыборку школьнай тэрыторыі – калі ў краіне эпідэмія каронавіруса, а ў школах – канікулы.
«Суботнік» мае прайсці ў аўторак, 7 красавіка, у межах месячніка па добраўпарадкаванні, абвешчанага старшынём Нясвіжскага райвыканкаму Аляксандрам Ломскім на мінулым тыдні.
«Вельмі хочацца папрасіць дапамогі. У краіне эпідэмія каронавіруса, а настаўнікаў са школаў падчас вакацыяў гоняць на азеляненне лесу або добраўпарадкаванне школьных тэрыторыяў. Выбачайце, мы не думаем што, калі ў нас ёсць дыплом настаўніка, то мы несмяротныя. Вясковыя школы адправілі на аддаленую працу. Чаму гарадскія павінныя займацца такім маразмам?! Які лес?! Якое добраўпарадкаванне?!» – цытуе настаўнікаў тэлеграм-канал.
4 красавіка ў суботніку па азеляненні гарадской тэрыторыі ўзялі ўдзел чальцы Нясвіжскага раённага Савету дэпутатаў. Як падаюць «Нясвіжскія навіны» яны «дружна і арганізавана» высадзілі 130 саджанцаў вярбы на вуліцы Карчміта.
Паводле афіцыйных звестак, перад выходнымі Меншчына была на трэцім месцы па колькасці інфікаваных каронавірусам сярод усіх вобласцяў. 3-га красавіка Мінздароўя зарэгістраваў тут 50 выпадкаў заражэння, падаваў «Tut.by».
ДД belsat.eu
