Стачка на «Беларуськаліі» працягваецца, хоць шмат працоўных ужо выйшлі на працу. Пра гэта «Белсату» паведамілі прадстаўнікі стачкаму прадпрыемства.
Як заявіў прадстаўнік прафсаюзу «Беларуськалію» Аляксандр Даноўскі, на 2-м рудаўпраўленні «Беларуськалію» людзі 21 жніўня выйшлі на працу.
«На гэты момант я магу сказаць, што людзі выйшлі на працу», – пацвердзіла і прадстаўніца стачкаму 3-га рудаўпраўлення Ірына Календа.
На іншых рудаўпраўленнях, паводле яе, сітуацыя неадназначная – хтосьці выйшаў на працу, хтосьці працягвае забастоўку.
Ірына Календа адзначыла, што стачкам цяпер выпрацоўвае «іншую стратэгію», але пра яе яна пакуль не захацела распавядаць.
Прэс-сакратар стачкаму «Беларуськалію» Глеб Сандрас заявіў, што ёсць частка людзей, якія не ходзяць на працу, але колькі іх – невядома. Таксама, паводле яго, ёсць людзі, якія прыходзяць на працу, але не працуюць.
«Першы руднік трымаецца», – заявіў прэс-сакратар.
Глеб Сандрас адзначыў, што на 1-м рудаўпраўленні працуюць толькі адміністрацыя і тыя, каму спыніць працу не дазваляюць горна-геалагічныя ўмовы. «Пакуль наш фарпост – гэта першы руднік», – падкрэсліў ён.
Тэлеграм-чат стачкаму «Беларуськалію» прапаноўвае ўсім ахвочым сабрацца а 16:00 каля галоўнага ўваходу, а да 17:00 – перайсці на галоўную плошчу.
Таксама адзначаецца, што валанцёры прывезлі страйкоўцам прадукты.
Між тым NEXTA апублікаваў зварот Дзмітрыя Кудзялевіча – аднаго з лідараў стачкаму «Беларуськалію», якога 20 жніўня затрымаў КДБ.
Шахцёр распавёў, што быў затрыманы супрацоўнікамі КДБ і дастаўлены ў аддзел. Там ён папрасіўся ў прыбіральню і праз адкрытую фортку пакінуў будынак. Раней, падчас затрымання, ён паспеў кінуць ключы ад аўтамабіля ў салон, а ў кішэні застаўся камплект ад аўтамабіля жонкі, які і забралі сілавікі. Цяпер Дзмітрый Кудзялевіч ва Украіне.
МГ belsat.eu