Менскі гарвыканкам вызначыў месцы, дзе забаронена збіраць подпісы выбарцаў за кандыдатаў, якія вылучыліся на выбары ў Палату прадстаўнікоў. Пра гэта паведамляюць «Минск-Новости».
Так, забаронена праводзіць пікеты на Кастрычніцкай і Прывакзальнай плошчах, плошчах Незалежнасці, Перамогі, Дзяржаўнага сцяга і Якуба Коласа.
Таксама пікетаваць нельга менш чым за 200 метраў ад рэзідэнцыі прэзідэнта, Нацыянальнага сходу і Савету Міністраў, за 50 метраў – ад будынкаў рэспубліканскіх органаў дзяржаўнага кіравання, мясцовых прадстаўнічых, выканаўчых і распарадчых органаў, дыпламатычных прадстаўніцтваў і консульскіх устаноў, судоў, органаў пракуратуры, а таксама арганізацыяў, якія забяспечваюць абароназдольнасць і бяспеку краіны.
Забароненыя пікеты на аб’ектах метро, чыгуначнага і паветранага транспарту, дарогах і ў падземных пераходах.
Ва ўсіх астатніх месцах пікетаванне дазволенае з 8:00 да 22:00.
Высоўванне кандыдатаў у дэпутаты мае пачацца 8 верасня. Ад гэтага моманту можна будзе праводзіць і пікеты.
МГ belsat.eu
