27 снежня надворʼе пачне паступова набываць зімовы характар, але да канца гэтага тыдня захаваецца цяпло, паведаміў belapan.by начальнік службы гідраметэаралагічных прагнозаў Рэспубліканскага цэнтру па гідраметэаралогіі, кантролі радыеактыўнага забруджвання і маніторынгу навакольнага асяроддзя Дзмітрый Рабаў.
Заўтра ноччу пераважна без ападкаў, днём на большай частцы тэрыторыі кароткачасовыя дажджы. Ноччу і раніцай у асобных раёнах туман. Днём месцамі па поўначы краіны ўзмацненне ветру парывамі да 15–18 м/с. Тэмпература паветра ноччу мінус 3 – плюс 2°С, днём плюс 2–7°С.
У Менску ноччу без істотных ападкаў, днём кароткачасовы дождж. Тэмпература ноччу прыблізна 0°С, днём плюс 3–5°С.
У суботу ноччу месцамі, днём на большай частцы тэрыторыі кароткачасовыя дажджы, па поўначы магчымы мокры снег. Ноччу і раніцай у асобных раёнах слабы туман і галалёд. Месцамі ўзмацненне ветру парывамі да 15–20 м/с. Тэмпература паветра ноччу мінус 1 – плюс 4°С, днём плюс 2–7°С, па паўднёвым захадзе да плюс 9°С.
У Менску ноччу без істотных ападкаў, днём кароткачасовы дождж. Тэмпература ноччу 0 – плюс 2°С, днём плюс 3–5°С.
«Пераломным момантам у змене надворʼя стане нядзеля, пры гэтым чакаюцца складаныя ўмовы надворʼя», – адзначыў Рабаў. На большай частцы тэрыторыі ападкі (мокры снег, дождж). У асобных раёнах моцныя ападкі. Месцамі галалёд, наліпанне мокрага снегу, на асобных участках дарог галалёдзіца. Тэмпература паветра на працягу сутак ад мінус 3°С па поўначы да плюс 7°С па поўдні.
У Менску ў нядзелю ападкі (мокры снег, дождж), часам моцныя ападкі. Тэмпература на працягу сутак плюс 1–3°С.
У панядзелак месцамі, пераважна на поўдні, кароткачасовыя ападкі з перавагай снегу. У асобных раёнах галалёд. На дарогах галалёдзіца. Тэмпература паветра на працягу сутак 0 – мінус 5°С, ноччу пры праясненнях да мінус 9°С, у паўднёва-заходніх раёнах ноччу і днём плюс 1–3°С.
ЮВ, belsat.eu, паводле belapan.by
