У Магілеўскай вобласці невядомыя выкралі і забілі лейтэнанта дарожна-патрульнай службы ДАІ. У 21.45 у эфіры БТ гібель афіцэра афіцыйна пацвердзіў прадстаўнік МУС. Следчы камітэт распачаў крымінальную справу паводле арт. 362 (забойства супрацоўніка органаў унутраных справаў пры выкананні службовых абавязкаў).
Паводле міліцэйскай арыентыроўкі, афіцэра ўвезлі на легкавым аўтамабілі ГАЗ («Волга») з цалкам таніраваным шклом і расейскімі нумарамі. Паводле TUT.BY, гаворка ідзе пра 67 або 69 регіен Расеі (Смаленская або Цвярская вобласць). Паводле Nexta, аўтамабіль меў нумары 98 рэгіёну – гэта горад Санкт-Пецярбург.
Міліцыянт быў выкрадзены каля 18:30, раней ён выехаў для разбіральніцтва на ДТЗ. Паводле папярэдняй інфармацыі, супрацоўнік ДАІ быў застрэлены са свайго ж пісталета. Злачынцы нібыта былі падобныя на ромаў.
Загінулы лейтэнант быў 1996 года нараджэння.
Асабісты склад міліцыі паднялі па трывозе, праваахоўнікі ў рэгіёне ўвялі план «Сірэна». На дарогах выставілі блокпасты.
Расследаванне будзе весці цэнтральны апарат Следчага камітэту. Ход расследавання знаходзіцца на асабістым кантролі ў старшыні СК Івана Наскевіча.
Паводле Тэлеграм-каналу Nexta справа ўжо на кантролі ў кіраўніка краіны.
ІІ belsat.eu