Расейскія прыправы з бактэрыямі групы кішачнай палачкі выяўленыя ў продажы ў Гарадзенскай вобласці. Пра гэта паведамляецца на сайце абласной інспекцыі Дзяржстандарту.
У адным з гандлёвых абʼектаў Наваградка інспекцыя выявіла молаты перац расейскай вытворчасці «Бабушкин хуторок». Пры правядзенні выпрабаванняў у акрэдытаванай лабараторыі ў спецыі былі знойдзены бактэрыі групы кішачнай палачкі.
А ў духмяным перцы гарошкам гандлёвай маркі «Приправка», які рэалізоўваўся ў Іўеўскім раёне, выяўленыя не толькі бактэрыі групы кішачнай палачкі (каліформы), але і цвіль. Колькасць цвілі перавышала дапушчальныя паказнікі ў 3,2 разу.
«Ужыванне прадукцыі з кішачнай палачкай стварае пагрозу нанясення шкоды жыццю і здароўю чалавека. Па выніках праверак выдадзеныя прадпісанні аб забароне да рэалізацыі небяспечнага перцу чорнага молатага і перцу гарошкам. Акрамя таго, спыненае дзеянне на тэрыторыі краіны дэкларацыі аб адпаведнасці. Прадукцыю занеслі ў рэестр небяспечнай прадукцыі, забароненай да ўвозу і (або) абарачэння на тэрыторыі Рэспублікі Беларусь, размешчаны на сайце Дзяржстандарту», – паведамляецца на сайце дзяржнагляду.
ІІ belsat.eu
