Прэс-сакратар МЗС Анатоль Глаз пракаментаваў магчымасць увядзення санкцыяў Еўразвязу ў дачыненні да Беларусі, перадае TUT.by.
Анатоль Глаз, афіцыйны прадстаўнік МЗС, выказаўся наконт складання санкцыйнага спісу ЕЗ у дачыненні да беларускіх палітыкаў.
«Санкцыі – гэта канец палітыкі. Таму ключавое пытанне – гэта ці ёсць у ЕЗ палітыка ў дачыненні да Беларусі. У нас ёсць. У замежнай палітыцы Беларусі Еўразвяз адназначна з’яўляецца адным з прыярытэтных напрамкаў. Таму ў любых умовах, пры любой абстаноўцы мы настроены на захаванне камунікацыі і працяг, хай і складанага, але дыялогу», – сказаў ён.
Еўразвяз не прызнае вынікі выбараў і мае намер увесці санкцыі супраць афіцыйных асобаў Беларусі, адказных за жорсткае здушэнне масавых пратэстаў пасля прэзідэнцкіх выбараў. Пра гэта стала вядома ўчора, 14 жніўня.
ЕЗ плануе ўвесці штрафныя захады ў дачыненні да «канкрэтных асобаў, якія вядомыя і якія ўчынілі злачынствы супраць мірных дэманстрантаў».
Чорны спіс можа быць падрыхтаваны і прадстаўлены на галасаванне да канца месяца.
КТ belsat.eu
