У мінулую нядзелю ў Менску прайшло традыцыйнае шэсце прыхільнікаў пераменаў, гэтым разам пад назваю Марш адзінства. Пасля завяршэння акцыі сілавікі жорстка затрымлівалі мітынгоўцаў. Адметна цяпер і тое, што ані АМАП, ані вайскоўцы не цураюцца масава хапаць дзяўчат.
Мянчук Аляксей, чыю жонку таксама затрымалі пасля маршу, распавёў belsat.eu, як гэта было:
Мы трапілі ў атачэнне сілавікоў каля заводу «Мотавела». Нам перагарадзілі рух, і на нас пачаў бегчы натоўп вайскоўцаў. Яны былі ў зялёнай форме з дубінкамі.
Хтосьці з групы пабег наперад, мы засталіся стаяць. Нас прыціснулі да будынку, мы сталі ў счэпку. Са мной была жонка Анжаліна.
Кіраўнік атраду падышоў да нас, ад нас выйшаў найбольш харызматычны хлопец. Мы сказалі, што проста хочам сысці дадому, на што ён прапанаваў дзве опцыі: без клопатаў прайсці ў аўтазак, або да нас прыменяць сілу і проста туды запхаюць.
Некалькі хлопцаў супраціўляліся, іх палупцавалі дручкамі і занеслі ў аўтазак. Я разумеў, што не мае сэнсу з імі змагацца, таму даў заплечнік жонцы і пайшоў добраахвотна.
Тады я думаў, што дзяўчат чапаць не будуць, але памыляўся. Нас прывезлі ў Завадскі РУУС, склалі пратакол. У актавай зале было больш за 100 мужчынаў. Дзяўчат трымалі асобна. Я нават здзівіўся, што да нас там нармальна ставіліся, не збівалі. 40 чалавек, у тым ліку мяне, адпусцілі апоўначы, 64 засталіся ў РУУС.
Калі выйшаў, пачаў званіць жонцы, але тэлефон быў недаступны. Пасля высветлілася, што Анжаліну таксама забралі – толькі ў Партызанскі РУУС. Цяпер яна ў Жодзіне.
Тут я дзяжуру з ночы. Да суда іх будуць трымаць тут, а калі суд – невядома. За ўвесь час, што я тут, выйшла адна асоба. У спісе затрыманых 6 верасня, які вывесілі на турме, – 259 чалавек.
У нядзелю па ўсёй краіне затрымалі 633 асобы, палову чакаюць суды.