«Мы мусім працягваць ціснуць». Штаб Віктара Бабарыкі распавёў пра далейшыя планы на кампанію

Кіраўніца штабу Віктара Бабарыкі Марыя Калеснікава 1 ліпеня ў онлайн-трансляцыі распавяла пра падрыхтоўку рэферэндуму, планы на агітацыю і «несапраўдныя» подпісы Валерыя Цапкалы.

«Мы адзін народ»

Трансляцыя пачалася з навінаў ад Віктара Бабарыкі. Марыя Калеснікава распавяла, што ён бачыўся з адвакатам і быў шакаваны тым, што ЦВК забракаваў больш за 200 тысячаў подпісаў.

Анонс онлайн-трансляцыі. Скрыншот

Ужо хутка, 12 ліпеня, штаб Бабарыкі арганізоўвае сустрэчу ініцыятыўнай групы наконт рэферэндуму па папраўках у Канстытуцыю. Сустрэча мусіць адбыцца ў менскім Парку Дружбы народаў, калі будзе ўзгодненая.

«Я хачу выразіць вялікую падзяку ўсім людзям, якія падтрымліваюць нас онлайн і оффлайн. Мы бачым, што мы адзін народ», – адзначыла кіраўніца штабу Марыя Калеснікава.

Усё добрае робіцца насуперак уладам

Яна адзначыла, што зараз сістэма ў Беларусі вельмі «слабая і некампетэнтная». Таму ўсё добрае, што адбываецца ў Беларусі, здараецца не дзякуючы, але насуперак сістэме, ад дзейных і кампетэнтных людзей.

«Мы паказваем сваю незадаволенасць і ладзім кіламетровыя чэргі па ўсёй краіны. І чыноўнікі пачынаюць ездзіць па ўсёй краіне і абяцаць павысіць заробкі і пенсіі. Хлопец, які апынуўся ў аўтазаку за свае перакананні, дапамог павысіць пенсіі. Людзі ў Берасці два гады кожную нядзелю пратэставалі супраць будаўніцтва акумулятранага заводу. Каб прэзідэнт у выніку прыехаў паразмаўляць з імі», – сказала Марыя Калеснікава.

Марыя Калеснікава падчас онлайн-трансляцыі. Скрыншот

Марыя Калеснікава параўнала дзяржаву са старым драндулетам, які аслабляе гайкі і толькі так робіць нешта для народу. Таму яна прапаноўвае ўселякім чынам выражаць сваю незадаволенасць сістэмаю.

«Усе невялічкія паслабленні зробленыя выключна пад ціскам людзей. Мы мусім працягваць ціснуць і паказваць сістэме тое, што такая яна нам не патрэбная. Нас – большасць. Мы неверагодныя, і змены – незваротныя».

Яна яшчэ раз адзначыла, што не думала, што ўлады здолеюць так «па-хамску» фальсіфікаваць выбары ва ўчастковыя камісіі. Кіраўніца штабу заклікала далучыцца да назіральнікаў, бо тым прасцей будзе сачыць за тым, каб кожны голас быў бы падлічаны.

Міліцыя прыйшла па Цапкалу і Статкевіча

Аб нерэгістрацыі Валерыя Цапкалы

«Гэта абуральна, што моцны альтэрнатыўны кандыдат, які мае сваё меркаванне і які сваёй працай, як Валерый Цапкала, стварэннем ПВТ, даказалі, што яны крутыя менеджары. Гэта абуральна, што іх не дапускаюць да выбарчага працэсу і да сумленнай барацьбы», – заявіла Марыя Калеснікава.

Таксама яна выказала словы падтрымання і салідарнасці штабу Валерыя Цапкалы.

Валер Цапкала сустрэўся з жыхарамі Бараўлянаў. 4 чэрвеня 2020. Ірына Арахоўская / Belsat.eu

Зараз штаб чакае 14 ліпеня, калі будзе вядомыя зарэгістраваныя кандыдаты. Ад гэтага залежаць іхныя далейшыя дзеянні.

«Мы спадзяёмся, што ўлада не напалохаецца і дапусціць да выбараў усіх альтэрнатыўных кандыдатаў».

Калі Віктара Бабарыку зарэгіструюць як кандыдата на прэзідэнцтва, штаб будзе праводзіць сустрэчы ва ўсіх гарадах Беларусі.

«Мы будзем камунікаваць, дыскутаваць, выражаць салідарнасць адно з адным і падтрымліваць», – распавяла Марыя пра планы на гэтую кампанію.

Марш салідарнасці з Беларуссю ў Варшаве сабраў не менш за тысячу чалавек

Нас вельмі шмат

Кіраўніца штаба Бабарыкі заклікае 3 ліпеня паехаць на прыроду або на лецішча і распавесці там блізкім, асабліва сталым людзям, пра сапраўдную сітуацыю ў краіне.

«Не толькі тое, што паказваюць у тэлевізары – праўда. Ёсць яшчэ іншая рэчаіснасць. Ёсць беларусы, ёсць мы. І нас вельмі шмат», – так закончыла свой зварот Марыя Калеснікава.

  • Віктар Бабарыка знаходзіцца ў СІЗА КДБ ад 18 чэрвеня. Ягонае затрыманне выклікала акцыі салідарнасці па ўсёй Беларусі.
  • 14 ліпеня стане вядома, каго ЦВК зарэгістраваў кандыдатамі на прэзідэнцтва. Штаб Бабарыкі здаў 365 тысячаў подпісаў, ЦВК прызнаў сапраўднымі толькі 165 тысячаў з іх.

КТ belsat.eu

Hавiны