«Мы хочам, каб нас пачулі». Сваякі асуджаных паводле эканамічных артыкулаў звярнуліся ў адміністрацыю Лукашэнкі

Грамадзянская ініцыятыва «Справядлівы прысуд», якая аб’ядноўвае сваякоў асуджаных за эканамічныя злачынствы, накіравала зварот кіраўніку Адміністрацыі прэзідэнта Ігару Сергяенку з просьбай гуманізаваць пакаранні, аднавіць правы несправядліва асуджаных і стварыць адмысловую камісію ў памілаванні. Тэкст ліста перадалі журналістам belsat.eu прадстаўнікі ініцыятывы.

Аўтары ліста адзначаюць, што ў крымінальных справах іх блізкіх маецца шэраг парушэнняў – у тым ліку фальсіфікацыя доказаў, ціск, няправільная кваліфікацыя зробленага.

«Такім чынам, у месцах пазбаўлення волі на доўгія гады апынуліся людзі, якія не маюць той ступені віны і таго складу злачынства, па якім іх асудзілі», – падкрэсліваецца ў лісце.

Сябры ініцыятывы «Справядлівы прысуд» наракаюць на абвінаваўчы ўхіл у беларускаму правасуддзі: на іх думку, у судзейскім корпусе сфармавалася перакананне ў тым, што «справа, якая патрапіла ў суд, ужо даказаная на сто працэнтаў». І калі падазраваны ў ходзе следства трапляе пад варту, то ён абавязкова ў выніку прысуджаецца да пазбаўлення волі. Акрамя таго, з асуджаных спаганяюць вялізныя сумы.

«Пры такіх умовах адбываецца наступнае: людзі асуджаюцца, адпраўляюцца адбываць пакаранне, на іх ускладаецца пакрыццё недаказанай шкоды, на выплату якой сродкаў няма. І пра гэта следства ведае першапачаткова, бо правярае ўсе маёмасць і актывы, накладаючы арышт на бытавую тэхніку 10 гадовай даўніны, якая фактычна нічога не каштуе. У гэтым выпадку закранаюцца інтарэсы ўсіх чальцоў сям’і, якія пражываюць з абвінавачваным», – гаворыцца ў лісце.

На думку «Справядлівага прысуду», «у дачыненні да справаў па эканамічных злачынствах, аднесеных да карупцыйных, складаецца сітуацыя, аналагічная справах па арт. 328 КК РБ» – пад пераследу трапляюць невінаватыя людзі.

Сваякі асуджаных просяць Лукашэнку разгледзець пытанне аб стварэнні на аснове дзейнай камісіі па памілаванні асобнага напрамку па разглядзе справаў, «у абставінах і прысудах якіх прысутнічаюць усе выкладзеныя ў дадзеным звароце довады». Туды прапануецца ўключыць былых суддзяў Вярхоўнага і Канстытуцыйнага судоў, пракурораў, дэпутатаў парламента, якія не працуюць больш за 10 гадоў, а таксама праваабаронцаў і адвакатаў. Аўтары ліста патрабуюць аднавіць канстытуцыйныя правы грамадзянаў, асуджаных несправядлівымі прысудамі.

«Адказнасць за гэтых людзей на сябе могуць узяць сваякі пры пэўных на заканадаўчым узроўні ўмовах», – адзначаецца ў лісце.

«Справядлівы прысуд» прапануе заканадаўча прыраўняць 1 дзень у СІЗА да 2,5 днях у калоніі, бо рэжым утрымання ў СІЗА больш суровы. Прапануецца ўвесці мараторый на дзеянне змяненняў у Крымінальны кодэкс, па якім асобы, асуджаныя па карупцыйных (эканамічным) артыкулах, пазбаўленыя права на ўмоўна – датэрміновае вызваленне і іншыя паслабленні.

«Кожны дзень для нашых блізкіх, асуджаных незаконна і несправядліва ў месцах пазбаўлення волі – гэта цэлае жыццё, і няма ніводнага дня, каб мы – іх блізкія і родныя людзі, пра гэта не думалі. І мы хочам, каб нас пачулі ўлады і таксама пачалі думаць пра тое, што адбываецца ў краіне, пра нас і нашых блізкіх людзях, як не аб лішнім элеменце, а як аб паўнавартасным, а галоўнае паўнапраўным складніку нашай дзяржавы».

Подпіс пад зваротам паставілі 2 357 чалавек, сцвярджаюць актывісты ініцыятывы.

ІІ belsat.eu