23 верасня адбылася неанансаваная інаўгурацыя Аляксандра Лукашэнкі. Практычна адразу пасля завяршэння цырымоніі і да глыбокай ночы ў Менску ды іншых гарадах людзі выходзілі на вуліцы на знак пратэсту супраць далейшага перабывання Лукашэнкі на пасадзе кіраўніка краіны.
Фотакарэспандэнтка «Белсату» Ірына Арахоўская паразмаўляла з удзельніцамі акцыі, якія «каранавалі» сябе на знак пратэсту.
Алена: «Кожны ў гэтай краіне можа сябе каранаваць, таму мы таксама вырашылі гэта зрабіць».
Марына: «Гэта дзявочы флэш-моб, мы ўсе каралевы. І мы вырашылі сябе каранаваць, раз гэта можна зрабіць тайна».
Вольга: «У серады мы гуляем з парасонамі. Але сёння ў нас каралеўская прагулка. Мы паказваем, што ў кожнага беларуса і беларускі ёсць чалавечая годнасць, мы каралі ў гэтай краіне».
Увечары 23 верасня па ўсёй краіне былі затрыманыя больш за 250 чалавек, паведамляе праваабарончы цэнтр «Вясна». Паводле праваабаронцаў і сведкаў затрыманняў, сілавікі працавалі з асаблівай жорсткасцю. Затрыманні 23 верасня ўжо параўноўваюць з падзеямі 9-11 жніўня, калі было збіццё і катаванне затрыманых дэманстрантаў.