Букінгемскі палац паведамляе, што 97-гадовы герцаг Эдынбургскі не пацярпеў. Інцыдэнт адбыўся непадалёку ад каралеўскага Сандрынгемскага палаца ў графстве Норфолк, піша БІ-БІ-СІ.
Букінгемскі палац паведаміў, што аварыя адбылася з удзелам яшчэ аднаго аўтамабіля, а на месцы здарэння працуе паліцыя. Прынц Філіп сам знаходзіўся за рулём аўтамабіля Range Rover. ДТЗ адбылося, калі ён выязджаў на трасу А149. Па словах відавочцаў, у выніку аварыі аўтамабіль герцага перакуліўся.
Відавочцы таксама распавялі, што дапамаглі яму выбрацца з машыны. Ён быў у прытомнасці, але моцна шакаваны. Герцаг Эдынбургскі змог пакінуць месца здарэння без дапамогі.
Двум асобам, якія знаходзіліся ў іншым аўтамабілі, была аказана медычная дапамога. Яны атрымалі невялікія траўмы.
Сам герцаг быў дастаўлены ў Сандрынгемскі палац, дзе яго агледзеў лекар, які пацвердзіў, што прынц Філіп не атрымаў ніякіх траўмаў.
Каралева і герцаг Эдынгбуржскі знаходзяцца ў Сандрынгемскім палацы з Калядаў.
СК, belsat.eu
