МУС Расеі падрыхтавала законапраект, які прадугледжвае адміністрацыйную адказнасць за непавагу да паліцыянтаў у інтэрнэце. Адпаведная ініцыятыва апублікаваная на партале нарматыўных прававых актаў РФ.
Дакумент распрацаваны па даручэнні кіраўніка МУС Уладзіміра Калакольцава, піша DW.com. Адказнасць можа быць накладзена за распаўсюд «звестак ганебнага характару» і «замаху на недатыкальнасць гонару і годнасці паліцэйскіх у інтэрнэце».
У тлумачальнай запісцы да законапраекту пазначана, што «наспела неабходнасць стварэння механізму рэалізацыі сацыяльных гарантыяў супрацоўнікаў паліцыі». Аўтары разлічваюць, што яго прымуць у студзені 2020 года.
За аснову будучага закона будзе ўзяты механізм ужо існага закона аб пакаранні за непавагу да ўлады. Ён уступіў у сілу ў сакавіку гэтага года і прадугледжвае штраф да 30 тысячаў рублёў (465 долараў ЗША), інтэрнэт-рэсурсы абавязаны выдаляць такую інфармацыю па патрабаванню Раскамнагляду.
У нашай краіне досыць часта разглядаюцца крымінальныя справы паводле артыкулу 369 КК Беларусі «Публічная знявага прадстаўніка ўлады ў сувязі з выкананнем ім службовых абавязкаў». Пакаранне за такое парушэнне прадугледжвае грамадскія працы, штраф, папраўчыя працы на тэрмін да 2 гадоў, арышт або абмежаванне волі на тэрмін да 3 гадоў. Толькі цягам бягучага лета паводле гэтага артыкулу былі асуджаныя два чалавекі: жыхар Бабруйску і Віцебска.
СК belsat.eu