Мітынг Святланы Ціханоўскай у Ваўкавыску

У Ваўкавыску распачынаецца мітынг кандыдата ў прэзідэнты Беларусі Святланы Ціханоўскай. На дадзены момант на наберажнай па вуліцы Карла Маркса, дзе адбываецца мерапрыемства, ужо больш за 2 тысячы чалавек. Святлана Ціханоўская выступае на мітынгу.

17:30. Мітынг скончыўся. Святлана Ціханоўская і яе каманда выпраўляюцца ў Слонім. Там акцыя распачнецца а 19 гадзіне.

17:10. Вераніка Цапкала пад час свайго выступлення назвала Ваўкавыск беларускай Жэневай. Яна дадала, што зараз улады пужаюць беларусаў стратай суверэнітэту, аднак дзеянні ўладаў, што адбываюцца цяпер, хутчэй прывядуць да страты суверэнітэту, чым новы прэзідэнт. Жыхары Ваўкавыску ў адказ крычалі, што хочуць працаваць у Беларусі і зарабляць тут дастойныя заробкі.

16:50. Марыя Калеснікава распачала свой выступ са слоў пра непатрэбную мадэрнізацыю прадпрыемстваў, замест неабходных рэформаў. Жыхары Ваўкавыску актыўна вітаюць яе прамову.

Марыя Калеснікава ў Ваўкавыску. Фота: «Белсат»

16:40. Пасля слоў Святланы Ціханоўскай пра палітвязняў, Ваўкавыск скандуе «свабоду»!

16:30. Святлана Ціханоўская, Марыя Калеснікава і Вераніка Цапкала распачалі свой выступ у Ваўкавыску. Святлана распачала свой выступ з таго, што калісьці яе муж – Сяргей Ціханоўскі здымаў рэкламу для Ваўкавыскага мясакамбінату. Тады яму там падарылі статую ваўка, таму Ваўкавыск для яе не чужы горад.

Зараз на мітынгу каля 3000 чалавек.

У Ваўкавыск каманда Святланы Ціханоўскай прыехала з Горадні. Далей кандыдатка на прэзідэнта накіруецца ў Слонім.

Святлана Ціханоўская ў Горадні. ВІДЭА, ФОТА

belsat.eu

Hавiны