Мінздароўя паскардзілася ў Генпракуратуру на расследаванне «пра небяспечныя прышчэпкі»
Міністэрства аховы здароўя мяркуе, «што фармат падачы інфармацыі і грубая падача фактаў у артыкулах, апублікаваных на адным з інтэрнэт-рэсурсаў [«Ежедневник». – Заўв. Belsat.eu] і перадрукаваных іншымі СМІ, могуць нанесці шкоду нацыянальнай бяспецы Рэспублікі Беларусь у галіне аховы здароўя», гаворыцца ў заяве, апублікаванай на сайце ведамства.
Ведамства накіравала адпаведныя дакументы ў Генпракуратуру.
Нагадаем, што выданне «Ежедневник» (ej.by) апублікавала расследаванне, у якім сцвярджаецца, што прышчэпка «Eupenta» карэйскай вытворчасці не прайшла рэгістрацыю ні ў Паўднёвай Карэі, ні ў Беларусі. Журналісты ej.by падкрэсліваюць, што выкарыстанне незарэгістраванай вакцыны ў Беларусі забараняе закон «Аб лекавых сродках». Выключэннем можа быць увоз незарэгістраваных лекаў з мэтаю выпрабаванняў падчас масавых эпідэміяў.
«Паколькі за апошнія гады ніякіх усплёскаў эпідэміяў не было, то можна падумаць, што масавы завоз «Eupenta» адбыўся «для правядзення клінічных выпрабаванняў», іначай мытня б проста не прапусціла тавар. І вось тут самае страшнае, бо ўдзел у выпрабаваннях – гэта добраахвотная справа, за якую плоцяць вялізныя грошы і кампенсацыі, калі нешта пойдзе не так. На такія выпрабаванні фармацэўтычныя кампаніі выдаткоўваюць гады і дзясяткі мільёнаў долараў. А тут для карэйскай кампаніі бясплатна зладзілі палігон выпрабаванняў на беларускіх дзецях. Можа, не зусім бясплатна?», – піша ej.by.
Мінздароўя сцвярджае, што карэйская прышчэпка трапіла ў Беларусь пасля ўзнікнення праблемаў з пастаўкамі расейскай прышчэпкі АКДС «належнай якасці».
Кампанія «Микроген» у каментары ej.by паведаміла, што іхная прышчэпка зарэгістраваная ў Беларусі і ніякіх нараканняў на якасць у беларускага Мінздароўя не было.
Паводле Мінздароўя, карэйская прышчэпка прайшла «перакваліфікацыю» (праверку) у Сусветнай арганізацыі аховы здароўя (СААЗ).
«Калі прайшла праграму перакваліфікацыі, то якасць гарантаваная», – паведаміў TUT.BY Батыр Бердыклычаў, прадстаўнік СААЗ у Беларусі.
«У краінах, дзе нацыянальныя рэгулятарныя агенцтвы недастаткова моцныя, прекваліфікацыя акурат з’яўляецца гарантыяй.
Рэгістрацыя і правядзенне выпрабаванняў – вельмі дарагія рэчы і для краіны, і для кампаніі. Тут ідзе і эканомія сродкаў, і гарантыя якасці. Калі які-небудзь беларускі вытворца прэпаратаў захоча выйсці на міжнародны рынак, каб той жа UNICEF закупляў у яго лекі, умова праходжання праз праграму перакваліфікацыі абавязковая», – дадаў прадстаўнік СААЗ.
У другой частцы свайго расследавання ej.by апублікаваў фота ўлёткі прышчэпкі «Eupenta», у якой у графе «Пабочныя эфекты» апісваюцца магчымыя негатыўныя рэакцыі на расейскую прышчэпку АКДС. Пабочныя эфекты ад «Eupenta» (пакет з некалькіх вакцынаў) сфармуляваныя наступным чынам: «тип и частота тяжелых побочных реакций не имеет значительных различий по сравнению с реакциями на вакцины АКДС, гепатита В и Hib».
«Замест указання тэрміну прыдатнасці, напрыклад, 2 гады, напісана проста і ня мудрагеліста: «не мінуў». З такім надпісам на рынак Беларусі не тое лекі, але наагул ні адзін прадукт нельга выпускаць. Бо «не мінуў» будзе і праз год, два і праз 50 гадоў», – піша ej.by.
- Сям’я памерлага пасля прышчэпкі немаўляці: «Проста прывезлі дзіця ў нейкай кардоннай скрыні»
- «У рэанімацыі ён яшчэ маргаў вачыма». Што вядома пра смерць дзіцяці пасля прышчэпкі
ЮВ, belsat.eu
