Ведамства кажа, што ўсім пацярпелым аказаная неабходная дапамога. Гэтыя звесткі былі апублікаваныя ў іхным Telegram-канале.
Мінздароўя апублікаваў звесткі па колькасці пацярпелых ад дзеянняў міліцыі. Яны запэўнілі, што ўсім пацярпелым была аказаная неабходная медычная дапамога.
«За апошнія два дні пасля несанкцыянаваных вулічных акцыяў у службу хуткай медычнай дапамогі і ў лякарні звярнуліся грамадзяне з рознымі траўмамі. На сённяшні момант у стацыянарах рэспублікі знаходзяцца на лячэнні крыху болей за 200 грамадзянаў. У тым ліку з ударамі мяккіх тканінаў, траўмамі канечнасцяў. Некалькі чалавек былі шпіталізаваныя з чэрапна-мазгавымі траўмамі, а таксама з траўмамі грудной клеткі і жывоту. У асноўным траўмы лёгкай ступені цяжкасці. Некалькім пацыентам патрабавалася правядзенне аперацыяў. Стан іх стабілізаваны», – гаворыцца ў паведамленні.
Яны пацвердзілі смерць аднаго чалавека.
Тым часам у рэдакцыю «Белсату» прыходзяць гісторыі ад чытачоў, якія былі жорстка збітыя падчас дэманстрацыяў. Некаторым праламілі чэрап, і іхнае жыццё зараз пад пагрозаю.
КТ belsat.eu