У студзені 2018 года Нацыянальны акадэмічны вялікі тэатр оперы і балета Беларусі плануе паказаць у Вільні балет «Вітаўт».
У анонсе гэтай падзеі падкрэслівалася, што балет прымеркаваны да стогадовага юбілею незалежнасці Літвы, паведамляе выданне.
Міністр культуры Літвы Ліяна Руакітэ-Ёнсан мяркуе, што гэта дэманстрацыя «мяккай сілы» і правакацыя.
«Адназначна негатыўна ацэньваю спробу арганізатараў выступу далучыцца да мерапрыемстваў стагоддзя аднаўлення дзяржавы. Звяртаю ўвагу, што гэты выступ ніяк не звязаны з праграмай стагоддзя аднаўлення Літоўскай дзяржавы, больш за тое, не атрымлівае ніякага фінансавання ад міністэрства культуры», – заявіла міністарка.
«На маю думку, з улікам намаганняў нашых усходніх суседзяў выкарыстоўваць культуру і мастацтва ў якасці інструментаў “мяккай сілы”, арганізацыю такіх мерапрыемстваў напярэдадні 16 лютага [Дзень аднаўлення літоўскай дзяржаўнасці – заўв. Belsat.eu] трэба разглядаць як правакацыю», – падкрэсліла Руакітэ-Ёнсан.
На сайце, праз які вядзецца продаж білетаў, тэкст пра сувязь паказу з юбілеем літоўскай незалежнасці ўжо выдалены.
Балет «Вітаўт» быў пастаўлены ў 2013 годзе. Аляксандр Лукашэнка адзначыў балет прэміяй «За духоўнае адраджэнне».
«Літоўскія гісторыкі мяркуюць, што беларусы прысвойваюць сабе князёў ВКЛ у якасці герояў беларускага народу», піша ru.delfi.lt.
ЮВ, belsat.eu