Праваахоўнікі і кантралёры нацэлены перш за ўсё на прафілактыку правапарушэнняў сярод прадпрымальнікаў, заявіў сёння міністр эканомікі Уладзімір Зіноўскі.
«Судовая сістэма, МУС, КДК настроеныя не на тое, каб, як гаворыцца, біць па хвастах, а на тое, каб апярэдзіць парушэнне, каб яно не магло быць здзейснена», – цытуе словы Зіноўскага БелТА.
Задача органаў кіравання, пачынаючы ад раённага звяна, – весці сярод прадпрымальнікаў тлумачальную працу, дадаў міністр.
Паводле слоў Зіноўскага, далейшыя крокі па развіцці прадпрымальніцтва цяпер абмяркоўваюцца з бізнес-саюзамі.
Дэкрэт аб развіцці прадпрымальніцтва быў прыняты сёння да ведама Палатай прадстаўнікоў. Новы дакумент прадугледжвае змяненне некаторых механізмаў узаемадзеяння дзяржорганаў і бізнесу, мінімізуе ўмяшанне службовых асобаў у працу суб’ектаў гаспадарання і ўзмацняе механізмы самарэгулявання бізнесу.
Пры гэтым захоўваецца «мінімальна неабходны» ўзровень кантролю з боку дзяржавы.
КА, belsat.eu