Міністэрства аховы здароўя: у Беларусі 562 інфікаваных COVID-19, 8 пацыентаў памерлі
Паводле Міністэрства аховы здароўя, па стане на раніцу 5 красавіка ў Беларусі былі інфікаваныя каронавірусам 562 чалавекі: 502 праходзяць лячэнне ў шпіталях, 52 выздаравелі, 8 памерлі.
Гэтыя дадзеныя Мінздароўя апублікавала ў сваім афіцыйным тэлеграм-канале.
«У Беларусі па стане на 2020/04/05 на стацыянарным лячэнні з каронавіруснай інфекцыяй знаходзяцца 502 чалавекі. У большай часткі пацыентаў захворванне працякае ў лёгкай ці сярэдняй форме. Пасля праходжання лячэння выздаравелі 52 чалавекі. Зарэгістравана 8 выпадкаў смерці пацыентаў, у якіх шматлікія хранічныя захворванні былі абцяжараны каронавіруснай інфекцыяй», – адзначаецца ў паведамленні Міністэрства аховы здароўя.
Мінздароўя трэці дзень запар публікуе лічбы інфікаваных COVID-19. У пятніцу, 3 красавіка, быў пацверджаны 351 выпадак заражэння, 4 красавіка – 440 (+89), 5 красавіка – 562 (+122). Такім чынам, толькі за два апошніх дні ў Беларусі было зарэгістравана 211 новых выпадкаў інфікавання каронавірусам.
Колькасць памерлых за два дні вырасла ўдвая: з 4-х афіцыйны пацверджаных смерцяў па стане на 3 красавіка да 8 смерцяў па стане на 5 красавіка.
Паводле інфармацыі СМІ, у Беларусі памерлі да 10 чалавек з каронавіруснай інфекцыяй (толькі сёння журналісты паведамілі пра два выпадкі смерці). Імёны дзевяці з іх вядомыя:
- 30 сакавіка ў Віцебску памерлі 75-гадовы Віктар Дашкевіч і 73-гадовая Аляксандра Чэпік;
- 1 красавіка памерлі 70-гадовая настаўніца з Копыльскага раёну Наталля Арлова і 67-гадовая жыхарка Менску Вольга Дзеравянка;
- 2 красавіка ў Віцебск памёр 70-гадовы пенсіянер Уладзімір Сідараў, а ў Менску – 60-гадовы Сяргей Говар.
- 3 красавіка ў Віцебску памерла 47-гадовая медсястра Святлана Кісялёва і былы следчы абласной пракуратуры Анатоль Высоцкі;
- 4 красавіка ў Менску памёр 69-гадовы былы працаўнік Нацбанку Юрый Осіпаў.
ІІ belsat.eu
