Міліцыя шукае адміністратараў тэлеграм-каналу «Пінск для жыцця чат»

16 кастрычніка міліцыя прыйшла праводзіць агляд з апісваннем маёмасці адразу да 4 жыхароў Пінску. Усе яны раней з’яўляліся адміністратарамі тэлеграм-каналу «Пінск для жыцця чат», а таксама мелі дачыненне да ініцыятыўнай групы Святланы Ціханоўскай. Падчас агляду ў пінчукоў вынялі ўсю тэхніку, якую знайшлі, а таксама запатрабавалі паролі ад тэлефонаў і ноўтбукаў.

Пінск для жыцця чат. Скрын з тэлеграм-каналу

Міліцыя правяла агляды з выманнем тэхнікі па месцы рэгістрацыі Вячаслава Перца, у даверанай асобы Святланы Ціханоўскай Валерыя Рамановіча, у сябра ініцыятыўнай групы Алега Дзядзёрка. Таксама прыходзілі і да валанцёра Анатолія Чашуіна, але ў кватэру патрапіць не змаглі. На агляд памяшканняў у міліцыі мелася санкцыя пракурора Пінску Руслана Краўчука.

«Міліцыянты прыйшлі да маёй маці а 7-ай раніцы 16 кастрычніка і пачалі пераглядаць усе шафы. У выніку забралі сістэмны блок, якім ніхто не карыстаўся гадоў 10 і ноўтбук сястры. Маці 66 год, канешне, ёй было цяжка разабрацца, што яны ад яе хочуць. Ніякіх правоў яна не ведае і дакументаў у іх яна не спытала», – апісвае сітуацыю Вячаслаў Перац.

Вячаслаў Перац падчас выбарчай кампаніі з’яўляўся сябрам ініцыятыўнай групы Святланы Ціханоўскай у Пінску. Ягоная жонка – Юлія Трусіла была валанцёрам. Разам яны збіралі подпісы за вылучэнне Ціханоўскай. Прыкладна ў гэты час у Пінску з’явіўся тэлеграм-канал «Пінск для жыцця чат». Маладым людзям прапанавалі адміністраваць гэты канал, гэта значыць выдаляць паведамленні з лаянкай і з заклікам да нейкіх радыкальных захадаў. Гэтым Вячаслаў і Юля і займаліся. Спачатку з каналам, які налічваў 100 падпісчыкаў, супрацоўнічалі 7 такіх адміністратараў.

Юлія Трусіла і Вячаслаў Перац. Фота прадастаўленае Белсату

На думку Вячаслава, цяперашнія агляды з выманнем тэхнікі наўпрост звязаныя з тэлеграм-каналам «Пінск для жыцця чат». Яшчэ 17 ліпеня Вячаслава і яго жонку Юлію выклікалі ў пракуратуру. Іх папярэдзілі, што як адміністратары каналу яны будуць несці персанальную адказнасць. Пасля размовы Вячаслаў і Юлія адмовіліся ад статуса адміністратараў і сталі звычайнымі падпісчыкамі. Перад 9 жніўня ў «Пінск для жыцця чат» было каля 3000 падпісчыкаў, пасля выбараў іх колькасць узрасла ўтрая.

«Як мы зразумелі, міліцыя вымае тэхніку, каб знайсці цяперашніх адміністратараў тэлеграм-каналу «Пінск для жыцця чат». Зараз функцыі адміністратараў выконваюць шмат асобаў, але, наколькі мне вядома, усе яны знаходзяцца за мяжой. Хто гэта канкрэтна, мы не ведаем», – кажа Юлія Трусіла.

Сябра ініцыятыўнай групы Святланы Ціханоўскай Алег Дзядёрка распавядае, што 16 кастрычніка да яго дадому прыйшлі з аглядам а 6-ай раніцы. Кажа, што міліцыянты фатаграфавалі і апісвалі ўсе рэчы, нават бідэ з унітазам, дзверы, усё. Забралі сістэмны блок і тэлефон. Жонка Алега хацела здымаць увесь гэты працэс на тэлефон, але ёй не дазволілі.

«Яшчэ падчас затрымання 7 жніўня мне міліцыянты сказалі, што я быў самы актыўны ў ініцыятыўнай групе Святланы Ціханоўскай у Пінску. Магчыма, таму і прыйшлі, як да «самага актыўнага». Наконт чату, я выконваў там функцыі адміністратара, каб не было ніякіх правакацыяў. Ведаеце, колькі там зараз сядзіць міліцыянтаў, яны могуць напісаць, што заўгодна. Мы сачылі, каб было ціха, мірна. Але мой акаўнт з тэлеграму выдалілі самі міліцыянты, таму я ўжо даўно не з’яўляюся адміністратарам таго чату», – сказаў Алег Дзядзёрка.

Тэлеграм-канал «Пінск для жыцця чат» пасля 9 жніўня атрымаў вялікую папулярнасць і разам з ёй амаль 9 тысяч падпісчыкаў. Там людзі знаходзяць аднадумцаў, скідваюць важную інфармацыю, там жа з’яўляюцца абвесткі пра ўсе акцыі пратэсту.

На думку актывістаў, цяпер ціснуць на тых, хто засвяціўся і каго ведаюць асабіста. І мэта гэтага ціску – перадухіліць выхад людзей на вуліцы.

«Я думаю, што сваю ролю згуляў і народны ўльтыматум, які агучыла Святлана Ціханоўская. Міліцыі трэба нешта зрабіць, каб не дапусціць масавых пратэстаў, яны не знайшлі ніякіх арганізатараў, нікога, і цяпер прыходзяць да першых, каго ведаюць», – каментуе сітуацыю Юлія Трусіла.

Вячаслаў Перац адзначае моцны ціск на ягоную сям’ю. Яго затрымалі яшчэ да выбараў 7 жніўня і арыштавалі на 15 содняў за заклікі да сустрэчы ў канале «Пінск для жыцця чат». Праз тыдзень пасля вызвалення Вячаслава да ягонай маці прыйшлі ўчастковыя. Яны зноўку абвінавацілі маладога чалавека ва ўдзеле ў несанкцыянаваным мерапрыемстве, але пасля справу прыйшлося скасаваць праз адсутнасць складу злачынства.

Вячаслаў Перац. Фота прадастаўленае Белсату

Вячаслаў працуе лекарам-гігіеністам у Пінскім занальным цэнтры гігіены і эпідэміялогіі. На працу да яго таксама прыходзілі невядомыя.

«Мне распавялі знаёмыя, што ўжо адбылася размова з галоўным лекарам, каб знайшоў любы спосаб пазбавіцца ад мяне. Мяне не могуць звольніць, як маладога спецыяліста, але напэўна яны што-небудзь прыдумаюць. Тое датычыцца і маёй жонкі Юліі Трусіла, якая праходзіць тут інтэрнатуру», – кажа Вячаслаў.

Зараз пратэстны настрой у Пінску, як і ў іншых гарадах, мяняе сваю форму. На вулічныя акцыі выходзіць нашмат меней людзей, чым раней. Затое пінчукі сталі збірацца невялікімі групамі на сваіх раёнах.

Вольга Васільева, belsat.eu

Hавiны