Рада Міжнароднай федэрацыі хакея (IIHF) прыме рашэнне аб месцы правядзення чэмпіянату свету гэтага года на сваім пасяджэнні ў канцы студзеня. Пра гэта паведаміў прэзідэнт IIHF Рэнэ Фазэль.
«IIHF выкарыстоўвае ўсе рэсурсы, каб дакладна зразумець сітуацыю, якая адбываецца ў Беларусі. У нас ужо шмат было дыскусіяў. Зараз нам трэба пагаварыць з урадам Беларусі і абмеркаваць сітуацыі палітычную і з каронавірусам. У канцы студзеня ў нас будзе паседжанне рады, на якой мы прымем рашэнне», – заявіў кіраўнік Міжнароднай федэрацыі, перадае ТАСС.
Паводле яго, IIHF размаўляе з хакейнымі федэрацыямі, якія могуць прыняць матчы чэмпіянату свету 2021 года.
«Гэта будзе сур’ёзным выклікам з фінансавага пункту гледжання», – сказаў Фазэль.
Раней швейцарскае выданне Watson паведамляла, што Чэмпіянат свету па хакею – 2021 дакладна пройдзе не ў Беларусі. Але іншае месца правядзення пакуль што яшчэ не вызначанае – ідзе актыўны ягоны пошук. Найбольш імавернымі варыянтамі з’яўляюцца Прага і Браціслава.
Цяпер Рэнэ Фазель прыляціць у Менск, каб асабіста і як мага мякчэй паведаміць пра адмену чэмпіянату свету Лукашэнку. Паводле крыніцаў выдання, ён не зрабіў гэтага дагэтуль толькі праз хваробу на COVID-19.
Турнір мусіў прайсці з 21 траўня па 6 чэрвеня ў Беларусі ды Латвіі.
МГ belsat.eu
