У Год Незалежнасці апынуцца перад пагрозаю зноўку гэтую незалежнасць страціць – яшчэ трэба пастарацца. А можа і пранясе, хто яго ведае. З афіцыйных паведамленняў – што Менску, што Масквы – цяжка зразумець, чым скончылася пераднавагодняя сустрэча Лукашэнкі і Пуціна ў Крамлі. Як, дарэчы, усцяж мы не ведаем пра вынікі вераснёўскай сустрэчы ў Сочы, хоць распавесці пра іх нам абяцалі неаднойчы.
Дзе ж не хапае словаў, даводзіцца зазіраць між імі.
Зрабіць крок насустрач, стварыць чарговую працоўную групу, працягнуць дамаўляцца пра дваццаць гадоў дамоўленае… Ува ўсім гэтым пратакольным шалупінні, бадай, найбольш насцярожваюць не справаздача крамлёўскага прэс-сакратара Дзмітрыя Пяскова, а… чатыры мяхі бульбы і сала, падораныя Лукашэнкам Пуціну яшчэ ў часе папярэдняга візіту, пра якія цяпер паведаміла беларуская калега Пяскова Наталля Эйсмант. То бок замест вынікаў апошняй сустрэчы па схеме «бочка нафты замест незалежнасці» – гастранамічныя забаўкі. Маўляў, трымайце – абмяркоўвайце.
Ну добра, абмяркуем. Бульбы і сала падарыў: маўляў, Ладзімірладзімірыч сала вельмі любіць, сам перадзамову зрабіў! Прыгожая байка, аднак, не вельмі зрастаецца з чуткамі пра маніякальны страх Пуціна быць атручаным, з-за чаго ён нібыта не давярае сваё харчаванне нікому акрамя ўласнага кухара. І тут раптам – ссабойка з Драздоў!
Дарэчы, хто-небудзь ведае, што ў адказ Пуцін падарыў Лукашэнку? І ці падарыў хоць штосьці наагул? Бо калі ў аднабаковым парадку, то нагадвае не святочны прэзент, а, хутчэй, нейкую даніну. Ну і мы ж усе цудоўна ведаем, каго савецкія людзі называюць «бульбашамі» і «салаедамі». Дык вось. Можа Пуцін і не пакаштуе Лукашэнкавых падарункаў асабіста, але ці адмовіцца Крэмль ад магчымасці праглынуць Беларусь ды Украіну – адказ на гэтае пытанне відавочны.
Але што ўсё-ткі з апошняй сустрэчай? Гартаю афіцыйныя сайты Лукашэнкі і Пуціна, гартаю беспарольную «Белту» – слухайце, ну маўчаць жа! Тры з паловай гадзіны сур’ёзна размаўлялі пра далейшае іхнае суіснаванне ў гэтым цяжкім тленным свеце – і нічога па сутнасці?
Між тым, як нагадвае гісторыя, маўчанне азначае згоду. Менавіта гэтымі словамі быў замацаваны Другі падзел Рэчы Паспалітай 23 верасня 1793-га году ў Горадні, дзе сабраныя ў каралеўскім замку, аточаным расейскімі грэнадзёрамі і гарматамі з запаленымі кнатамі, на апошні Надзвычайны Сойм краіны паслы на знак пратэсту маўчалі, што і было, у выніку, прызнанае акупантамі за адзінагалосную згоду.
Для падмацавання гістарычнай паралелі сёння ў Крамля рычагоў больш чым дастаткова. Гэта і палітычная ды эканамічная залежнасць Беларусі ад Расеі, і сетка прарасейскіх арганізацыяў па ўсёй нашай краіне, і фактычная адсутнасць мяжы паміж краінамі, з расейскага боку якой ужо два з паловаю гады стаяць разгорнутыя базы будучых «ветлівых грэнадзёраў». І нават генерал-губернатар – Бабіч – і той маецца.
Між тым калі гісторыя паўтараецца, то не варта забывацца і пра тое, што было пасля «Маўклівага сойму». А гэта – антырасейскае паўстанне, і не адно. І – вяртанне незалежнасці.
Дый, урэшце, нават калі маўчыць Лукашэнка, то яшчэ застаецца слова за намі. Праўда?
Рэдакцыя можа не падзяляць меркавання аўтара.