Менскую «дзясятку» перапрафілявалі пад пнеўманіі. Адзін з медыкаў інфікаваны каронавірусам


Ад 3 красавіка менская 10-я гарадская клінічная больніца лечыць пацыентаў з пнеўманіяй з пацверджаным дыягназам COVID-19 і з падазрэннем на каронавірусную інфекцыю. Пра гэта belsat.eu распавяла доктарка, якая працуе ў 10-й больніцы, і пацвердзіў фельчар адной з падстанцыяў хуткай дапамогі.

Паводле доктаркі, толькі за 3 красавіка ў «дзясятку» даставілі 30 чалавек з дыягназам пнеўманія. Усіх пацыентаў, якія раней былі на лячэнні, выпісалі або перавялі ў іншыя шпіталі. Таксама крыніца «Белсату» пацвердзіла, што адзін з медыкаў 10-й больніцы мае пацверджаны дыягназ COVID-19.

Агулам у 10-ай гарадской клінічнай больніцы 1 070 месцаў для хворых.

Hавiны
«Яна памерла за паўдня». Доктарка менскай «чацвёркі» пра тое, што забаронена казаць
2020.04.02 18:02

Фельчар менскай хуткай, які сам цяпер стаў кантактам першага ўзроўню, распавёў «Белсату», што за мінулы вечар і ноч у Менску шпіталізавалі больш за 90 пацыентаў з каронавірусам.

«Гэта былі менавіта не кантакты, а COVID-станоўчыя пацыенты. Я асабіста завёз дваіх, мой калега – 5 чалавек. А ў горадзе ўсяго 11 падстанцыяў», – кажа ён.

Фота «Белсат»

Паводле фельчара, 10-ю больніцу цалкам вызвалілі пад хворых на каронавірус яшчэ ўчора.

«З рэанімацыі вывезлі пацыентаў з іншымі дыягназамі, развезлі іх па іншых шпіталях. У «дзясятцы» працуюць цяпер толькі на прыём COVID. Фармальна пачынаюць рабіць гэта 6 красавіка, але я ўчора ўжо завёз туды дваіх. Прычым абодва – медыкі: медсястра таго ж шпіталю і неўролаг са шпіталю хуткай дапамогі», – кажа суразмоўца «Белсату».

Акрамя таго, ён кажа, што неўзабаве пад пнеўманіі могуць перапрафіляваць 8-ы шпіталь, які спецыялізуецца на гінекалогіі, і 11-ы рэабілітацыйны.

Фельчар скардзіцца, што медыкам – вельмі цяжка: сярод іх шмат кантактаў першага ўзроўню, але належнае абследаванне праходзяць далёка не ўсе.

«Даводзіцца хадзіць на працу, пакуль не адчуеш сімптомаў», – дадае мужчына.

ВІДЭА
Беларускія лекары запісалі відэазварот: Заразіцца большая частка насельніцтва
2020.04.04 10:56
  • Афіцыйна ў Беларусі на дзень 4 красавіка зафікасаваныя 440 выпадкаў каронавіруснай інфекцыі (394 на лячэнні і 41 чалавек выздаравеў). Міністэрства аховы здароўя пацвердзіла смерць 5 пацыентаў з каронавірусам па стане на 4 красавіка. Імёны памерлых не агучваліся.

КА belsat.eu

Стужка навінаў