Трохбаковая кантактная група па ўрэгуляванні канфлікту на Данбасе і прадстаўнікі ДНР і ЛНР на перамовах у Менску ўзгаднілі новае перамір’е, якое павінна ўступіць у сілу з поўначы 23 снежня.
Пра гэта паведаміла Дарка Оліфер, прэс-сакратар Леаніда Кучмы, які прадстаўляе Украіну ў ТКГ.
«Трохбаковая кантактная група з удзелам прадстаўнікоў ОРДЛО падкрэслівае неабходнасць забеспячэння міру і спакою ў сувязі з надыходзячымі каляднымі і навагоднімі святамі і, карыстаючыся раней дасягнутымі дамоўленасцямі і абавязацельствамі бакоў, у прыватнасці, пацвярджае іх прыхільнасць захаванню ўсёабдымнага, устойлівага і бестэрміновага рэжыму спынення агню, пачынаючы з поўначы 23 снежня 2017 па кіеўскім часе», – напісала Оліфер у Facebook.
Таксама бакі пацвердзілі намер правесці абмен закладнікамі да святаў.
Украінскі бок асобна выказаў абурэнне аднабаковым рашэннем Расеі вывесці сваіх прадстаўнікоў з Сумеснага цэнтру па кантролі і каардынацыі. Такі крок супярэчыць абавязацельствам РФ у рамках Нармандскага фармату і Менскага працэсу і ўжо прывёў да абвастрэння на фронце.
Нагадаем, паводле дадзеных штабу АТА, 19 снежня баевікі ДНР і ЛНР здзейснілі 32 абстрэлы. У выніку баявых дзеянняў двое вайскоўцаў загінулі, шасцёра былі параненыя, праводзілася эвакуацыя мясцовых жыхароў з населенага пункту Навалуганскае.
КА, belsat.eu