Галоўны трэнер «Дынама» Раман Піліпчук пакідае сваю пасаду, паведаміла прэс-служба сталічнага футбольнага клуба.
Такое рашэнне прынята «у сувязі з прапанаваным пераглядам кантрактных абавязацельстваў з прычыны часова нестабільнай фінансавай сітуацыі ў клубе». Кантракт скасаваны па пагадненні бакоў.
Традыцыйна «Дынама» расстаецца з трэнерамі менавіта ў траўні – сёння як раз апошні дзень месяца.
Раман Піліпчук узначальваў трэнерскі штаб менскага «Дынама» з 1 лютага 2019 года. Каманду таксама пакінуць ягоныя асістэнты Дзяніс Папоў, Уладзімір Уласенка і Іван Піліпчук.
Кіраваць камандай будзе Радзіслаў Арлоўскі.
Раней менскае «Дынама» пакінулі таксама генеральны дырэктар Сяргей Пернікаў і спартыўны дырэктар Віталь Булыга.
Цяпер пасаду гендырэктара клубу займае трэнер зборнай Беларусі па міні-футболе Андрэй Талмачоў.
КА belsat.eu
