Парламент Паўднёвай Карэі афіцыйна даў хаду працэдуры імпічменту ў адносінах да прэзідэнта краіны Пак Кын Хе, якая сёлета трапіла ў карупцыйны скандал праз сваю даўнюю сяброўку.
20 гадоў таму Вярхоўны Савет 13-га склікання паспрабаваў распачаць працэдуру імпічменту Аляксандру Лукашэнку. Аднак спроба правалілася. Тады на яго загад спецназ разагнаў дэпутатаў-галадоўнікаў, зладзіў незаконны рэферэндум, паводле вынікаў якога ў Беларусі скасавалі беларускую мову як адзіную дзяржаўную, герб Пагоня і бел-чырвона-белы сцяг перасталі быць афіцыйнымі, а Аляксандр Лукашэнка атрымаў паўнамоцтвы распусціць парламент.
Мы распыталі жыхароў сталіцы, ці магчымая ў Беларусі адстаўка прэзідэнта.
«Думаю, наўрад ці. Вельмі шмат баязліўцаў. Усе хочуць жыць спакойна, таму лішнія праблемы нікому не патрэбныя», – кажа жанчына.
«У нас народ памяркоўны, месцячковы. Нічога не будзе», – гаворыць мужчына.
«Ніколі ў жыцці», – ўпэўненая яшчэ адна апытаная.
«Большую частку ўсё задавальняе. Кожная краіна вартая свайго прэзідэнта», – лічыць жанчына.
«Паглядзіш на Украіну, дык хай будзе ціха ды спакойна», – кажа жанчына.
«Наша Канстытуцыя гэта дазваляе, але пытанне, ці хоча гэтага народ? Народ гэтага не хоча. Нас задавальняе прэзідэнт», – з упэўненасцю кажа апытаная жыхарка Менску.
«Мне падаецца, што нават калі захочуць, то нічога не атрымаецца. Відаць, патрэбна яшчэ не адно пакаленне», – дзеліцца думкамі дзяўчына.
«Калі зусім не будзе грошай. А пакуль людзі, відаць, не саспелі», – кажа малады мужчына.
«Нашыя людзі на гэта не здольныя, у іх няма столькі сілы волі», – кажа дзяўчына.
«У мяне ёсць меркаванне, але я баюся яго сказаць», – кажа жанчына.
Глядзіце больш у відэа.
ДР belsat.eu