Менчукі абмеркавалі законапраект аб хатнім гвалце

ВІДЭА

8 кастрычніка 2018 года. Удзельнікі публічнага абмеркавання канцэпцыі законапраекту аб хатнім гвалце прыйшлі да высновы аб неабходнасці парламенцкіх слуханняў па гэтым пытанні. Фота – Ірына Арахоўская / «Белсат»

Неабыякавыя менчукі разам з экспертамі абмеркавалі, што варта змяніць у актуальным заканадаўстве, каб перадухіліць гвалт у беларускіх сем’ях.

8 кастрычніка ў галерэі «Ў» прайшло адкрытае абмеркаванне канцэпцыі законапраекту аб перадухіленні хатняга гвалту.

На мерапрыемстве прысутнічалі ахвяры гвалту, прадстаўнікі грамадскіх аб’яднанняў, палітыкі і проста неабыякавыя жыхары гораду.

Паводле прысутных экспертаў, на сёння ў Беларусі няма комплекснага закона, які б падрабязна акрэсліваў паняцце «ахвяраў хатняга гвалту». Гэтак, згодна з законам, імі не могуць быць былыя муж ці жонка; у законе не існуе паняцця «эканамічнага хатняга гвалту».

У праекце закону, які распрацавала Міністэрства ўнутраных справаў, і які жорстка раскрытыкаваў кіраўнік краіны, гэтыя моманты былі ўключаныя.

«Сёння для нас прызнанне эканамічнага гвалту было б фактам прызнання, што ёсць і іншыя віды гвалту», – сказала Ірына Альхоўка, кіраўнічка аб’яднання «Гендэрныя пэрспэктывы» і сябра Нацыянальнай рады гендэрнай палітыкі, якая ў складзе рабочай групы пры МУС працавала над канцэпцыяй закону аб супрацьдзеянні хатняму гвалту.

Каардынатарка прытулку для жанчын і дзяцей «Радзіслава» Вольга Гарбунова звярнула ўвагу, што ў апошнія гады зацікаўленасць у новым законе выказвалі і дзяржаўныя структуры, але на сёння іхная прафілактыка хатняга гвалту не эфектыўная.

«Ні міліцыя, ні ўчастковыя не распавядаюць пра ахоўныя механізмы для жанчын. Закон цяпер не працуе», – дадала Гарбунова.

Удзельнікі дыскусіі прыйшлі да высноваў, што далейшымі крокамі па змене сітуацыя павінныя быць парламенцкія слуханні і з’яўленне сталай пляцоўкі для публічных дэбатаў на гэтую тэму, стварэнне адукацыйных праграмаў для дзяцей рознага ўзросту і выкарыстанне міжнароднага досведу ў вырашэнні праблемы.

8 кастрычніка ў менскім парку Горкага грамадскія актывісты развесілі акрываўленую бялізну на знак пратэсту супраць заявы Аляксандра Лукашэнкі аб тым, што ён не дапусціць прыняцця закону аб супрацьдзеянні хатняму гвалту.

ВР

Глядзі таксама
Каментары