Некалькі тысячаў людзей шпацыравалі, танчылі, фатаграфаваліся ды выпівалі, развітваючыся з зімой.
У лесапарку Пышкі гарадзенскія ўлады зладзілі для гараджанаў свята з нагоды Масленіцы. У імпрэзе прынялі ўдзел некалькі тысячаў чалавек.
Традыцыйна кожнае прадпрыемства ці ўстанову адукацыі абавязалі рабіць свой намёт ці экспазіцыю.
Уздоўж некалькіх сцежак у лесе паўсталі сталы з самаварамі і бублікамі, пляцоўкі для гульняў, фотазоны ды неймаверная колькасць лялек у чалавечы рост: ад прыбраных манекенаў да пудзілаў з саломы ў а-ля нацыянальных строях.
Алкаголю ў продажы не было, што не перашкаджала народу адпачываць «ад душы»: шмат хто прынёс з сабою пластыкавыя бутэлечкі з незразумелай вадкасцю. Але міліцыя асабліва нікога не чапала.
Песні пра «шашлычок пад каньячок», тэатральныя пастановы з удзелам цара Гароха і Снягурачкі, ансамблі «Тэлефон» і «Фабрычны каларыт» – класіка народных гулянняў у Беларусі.
Шмат было таксама сем’яў з дзецьмі. Аматары здаровага ладу жыцця маглі пацягаць гіру або пападцягвацца.
Цікава, што людзей у масках амаль не было: відаць, што страх перад каронавірусам да Горадні яшчэ не дабраўся.
Каб весяліць натоўп, на пляцоўку «Малочнага свету» прывезлі сапраўдную мядзведзіцу ў намордніку.
Жывёлу кармілі згушчонкай ды рабілі супольныя сэлфі.
Кульмінацыяй свята стала спаленне пудзіла, якое ўвасабляе зіму.
Таксама спалілі паперкі з рознымі злыбедамі, якія пісалі ад рукі і мацавалі да стэнду мінакі. Не з першага разу, але і пудзіла, і паперкі ўсё ж такі пайшлі дымам пад воплескі натоўпу.
АК, фота Васіль Малчанаў Belsat.eu