22 лістапада ў сталіцы і рэгіёнах прайшлі традыцыйныя нядзельныя маршы прыхільнікаў пераменаў у краіне. Галоўнае патрабаванне ўдзельнікаў акцыі: адстаўка Аляксандра Лукашэнкі з пасады кіраўніка краіны.
Адметнасць сённяшняй акцыі ў яе дэцэнтралізацыі, кропкі збору вызначаюць самыя ўдзельнікі маршу ў лакальных чатах. Гэтая тактыка была абраная пасля таго, як некалькі тыдняў запар супрацоўнікі міліцыі не давалі магчымасці людзям сабрацца разам і сфармаваць адну вялікую калону для маршу.
18:42. З менскіх РУУСаў мінімум 4 чалавекі былі забраныя на машынах хуткай дапамогі.
17:55. Большасць нашых чытачоў у тэлеграме ўхваляюць новы фармат акцыі.
17:15. Паводле звестак валанцёраў, сёння ў Менску затрымалі не менш за 200 чалавек.
16:55. Ягор Камісараў накіраваны ў БХМД ў непрытомным стане з раёну Нацыянальнай бібліятэкі. Агулам на гэты момант праваабаронцам вядома больш за 130 прозвішчаў затрыманых.
16:40. З плошчы Незалежнасці здымаюць агароджу.
16:20. Калона спецтэхнікі вяртаецца на базу ва Уручча, паведамляе карэспандэнт «Белсату», які знаходзіцца каля станцыі метро «Маскоўская».
16:10. Усе станцыі метро працуюць у звычайным рэжыме.
16:00. У Менску мабільныя аператары вярнулі мабільны інтэрнэт.
15:49. У 15:40 аўтобусам дазволілі спыняцца на праспекце Незалежнасці ў цэнтры Менску. Забарона дзейнічала больш як тры гадзіны.
15:42. Сілавікі з’язджаюць ад Стэллы.
15:24. Калону на пр. Дзяржынскага разагналі святлошумавымі гранатамі, але людзі сабраліся ізноў.
15:21. Поўная зачыстка на Паўднёвым Захадзе ў сталіцы каля «Берасця». Затрымліваюць жанчын і людзей сталага веку.
15:20. Каля метро «Каменная горка» зноўку былі стрэлы і выбухі!
14:55. Міліцыянты ў чорным ходзяць па падʼездах дамоў на вуліцы Багдановіча, шукаюць пратэстоўцаў.
14:45. Сілавікі са зброяй спрабуюць пужаць пратэстоўцаў на вул. Голубева ў Менску. Людзі праганяюць сілавікоў ды адбіваюць іншых пратэстоўцаў.
14:40. У Менску калона спецтранспарту, у тым ліку 2 вадамёты, рухаецца па вул. Каліноўскага ў бок Лагойскага тракту. Таксама вядома пра затрыманні на вул. Шаўчэнкі. Сілавікі правяраюць аўтамабілі.
14:30. Затрыманні каля метро «Пушкінская» у Менску.
14:25. Разгон і хлапкі каля парку Паўлава ў Менску.
14:20. Чытачы паведамляюць пра затрыманні на вул. Прытыцкага ў Менску.
14:10. Вядома ўжо пра два дзясяткі затрыманых. Сярод іх – лекар-раэніматолаг Зміцер Салошкін.
14:00. Затрыманні ў Каменнай Горцы і на вуліцы Веры Харужай.
13:55. На вуліцы Альшэўскага недалёка ад скрыжавання з Глебкі былі чуваць стрэлы. Людзі скандуюць: «Забойцы!». Калона рушыла далей праз двары.
13:50. АМАП не даў прайсці калоне, якая рухалася па вуліцы Багдановіча ў бок кавярні «Белая вежа». Людзі павярнулі назад. Рух транспарту на вуліцы Багдановіча перакрыты.
13:45. У мікрараёне Паўднёвы Захад сілавікі таксама ўжылі святлошумавыя гранаты супраць пратэстоўцаў. Але людзі, нягледзячы на выбухі, пайшлі на іх з узнятымі рукамі, выціснуўшы сілавікоў у бусы.
13:40. Калона пратэстоўцаў колькасцю некалькі тысяч чалавек рухаецца па вуліцы Багдановіча. Людзі з нацыянальнай сімволікай скандуюць: «Жыве Беларусь!»
13:25. Ва Уруччы вялікая калона ўжо дасягнула каля 4000 чалавек. Да яе далучаюцца меншыя калоны з іншых раёнаў гораду. Людзі выйшлі на дарогу, але прапускаюць грамадскі транспарт.
13:20. Відавочцы паведамляюць пра гукі стрэлаў і выбухаў каля гандлёвага цэнтру Green City на Каменнай горцы ў Менску.
13:05. Мабільны аператар А1 афіцыйна пацвердзіў адключэнне мабільнага інтэрнэту.
12:40. Удзельнікі маршу выходзяць у розных мікрараёнах сталіцы.
12:15. У Менску па-ранейшаму ачэпленыя стэла і палац Незалежнасці. Вельмі шмат тэхнікі на вуліцы Сапёраў.
12:05. На ўваход і выхад зачыненыя станцыі метро «Плошча Леніна», «Кастрычніцкая», «Плошча Перамогі», «Плошча Якуба Коласа», «Няміга», «Купалаўская», усе станцыі трэцяй лініі. Цягніка ідуць без прыпынку на гэтых станцыях.