МАРГ прадставіў новыя правілы прафілактыкі каронавірусу для некаторых публічных прастораў
Яны ўключаюць у сябе абавязковую дэзынфекцыю памяшканняў і маскі для працаўнікоў, гаворыцца на старонцы ведамства.
Міністэрства антыманапольнага рэгулявання і гандлю распрацавала рэкамендацыі па зніжэнні рызыкі распаўсюду каронавіруснай інфекцыі ў Беларусі. Яны датычаць установаў гандлю, грамадскага харчавання і побытавага абслугоўвання насельніцтва.
Згодна з новымі рэкамендацыямі юрыдычныя асобы і індывідуальныя прадпрымальнікі мусяць:
- рабіць штодзённае апытанне аб стане здароўя працаўнікоў
- забяспечыць усіх працаўнікоў індывідуальнымі сродкамі абароны дыхання, дэзынфікуючымі сродкамі для апрацавання рук і выдаць пальчаткі
- перадаваць ежу пакупнікам у запакаваным выглядзе
- рэгулярна праветрываў памяшканні
- арганізоўваць вільготную прыборку
- наносіць спецыяльную разметку для захоўвання дыстанцыі паміж пакупнікамі
- усталяваць перад касамі абарончыя экраны
У міністэрстве адзначаецца, што дадзеныя захады маюць рэкамендацыйны характар. Поўны спіс рэкамендацыяў знаходзіцца на старонцы МАРГ у падраздзелах «Рэгуляванне гандлю» і «Рэгуляванне грамадскага харчавання».
«Разам з гэтым МАРГ разлічвае на высокі ўзровень культуры, сацыяльнай адказнасці і паразуменне бізнес-супольнасці», – гаворыцца на старонцы ведамства.
Па ўсіх пытаннях можна звярнуцца на гарачую лінію ведамства па тэлефоне (8 017) 200-92-02.
КТ belsat.eu
