Макей распавёў Лаўрову пра «маштабныя палітычныя мерапрыемствы ў Беларусі»

22 студзеня адбылася тэлефонная размова міністра замежных справаў Расеі Сяргея Лаўрова з міністрам замежных справаў Беларусь Уладзімірам Макеем.

Бакі абмеркавалі актуальныя пытанні двухбаковых расейска-беларускіх стасункаў і бягучыя праблемы ў сферы стратэгічнай стабільнасці і кантролю над узбраеннямі, паведамілі ў МЗС Расеі.

У беларускім МЗС дадалі, што Макей праінфармаваў калегу аб развіцці ўнутрыпалітычнай сітуацыі і аб маючых адбыцца «маштабных палітычных мерапрыемствах у Беларусі».

Пра якія канкрэтна «маштабныя палітычныя падзеі» вялося падчас размовы не ўдакладняецца. Магчыма, гаворка ідзе пра гэтак званы Усебеларускі народны сход, які пройдзе 11-12 лютага і якому могуць надаць канстытуцыйны статус.

Існуе меркаванне пра тое, што Расея падштурхоўвае ўлады Беларусі да канстытуцыйнай рэформы і транзіту ўлады. Раней расейскія чыноўнікі, у тым ліку сам Лаўроў, звярталі вялікую ўвагу на важнасць зменаў Канстытуцыі ў Беларусі.

МГ belsat.eu