Намесніца старшыні Магілёўскага гарвыканкаму Ала Галушка адмовіла магілёўскім апазіцыянерам у правядзенні 14 траўня пікету. Старшыня абласной арганізацыі АГП Уладзімір Шанцаў і абласны каардынатар БХД Алег Аксёнаў збіраліся правесці сход на стадыёне па вуліцы Чэлюскінцаў з патрабаваннем адстаўкі Алы Галушкі, адказнай за ідэалагічную працу.
Як распавёў у каментары belsat.eu Уладзімір Шанцаў, заяўнікі, згодна з заканадаўствам, апавяшчалі пра намер правесці масавую акцыю ў дазволеным для гэтага месцы. Але на падставе таго, што ў звароце было напісана слова «заява», а не «апавяшчэнне», ім было адмоўлена.
«Заяву трэба падаваць за 15 дзён, але мы падавалі апавяшчэнне. Хоць і назвалі яго заявай. Але з тэксту зразумела, што гэта апавяшчэнне. Мы не прасілі дазволу, мы апавясцілі, што праводзім пікет», – адзначыў актывіст.
З прычыны адмовы, магілёўскія апазіцыянеры «не сталі гуляць у гульню словаў», змянілі слова ў тэксце і падалі апавяшчэнне на іншую дату, распавёў Уладзімір Шанцаў.
«Пачакаем яшчэ тыдзень», – дадаў ён.
Прычынай правядзення пікету актывіст назваў адхіленне ўсіх заявак на масавыя акцыі на падставе розных нагодаў.
«У агляднай мінуўшчыне ніводны пікет, ніводная масавая акцыя апазіцыйным партыям дазволеныя не былі», – сказаў суразмоўца.
Таксама ён назваў практычна не магчымымі ўмовы заключэння дамоваў на правядзенне масавых акцый і залішнюю забюракратызаванасць працэсу. Прычыны гэтага заяўнікі пікету бачаць у тым, што Ала Галушка не спрашчае бюракратычныя працэдуры і робіць лягчэйшым жыццё гараджанаў – «яна не на сваім месцы».
МГ belsat.eu