Лясныя пажары ў Грэцыі: больш за 70 загінулых. Еўразвяз абвясціў жалобу

Абноўлена

Ахопленыя агнём дамы падчас лясных пажараў у Грэцыі, фота AFP

На паўднёвым усходзе Грэцыі працягваюцца найбуйнейшыя за апошняе дзесяцігоддзе лясныя пажары. Паводле апошніх дадзеных, стыхійнае бедства забрала жыцці 74 чалавек.

Як паведамляе BBC, многія з загінулых не змаглі пакінуць вёску Маці ў 40 кіламетрах на паўночны ўсход ад Афін. Людзі загінулі, задыхнуўшыся дымам, проста ў сваіх дамах і аўтамабілях. Гэтая вёска была папулярная сярод турыстаў.

Сіла ветру дасягае 100 кіламетраў у гадзіну, і агонь распаўсюджваецца з вялікай хуткасцю. Сотні пажарных змагаюцца з агнём, ратавальнікі на лодках і верталётах эвакуююць людзей з ахопленых пажарамі раёнаў.

Жыхары раёнаў, якія пацярпелі ад лясных пажараў, спрабуюць пакінуць свае дамы. Грэцыя. Фота ЕРА

Некаторыя жыхары прыгарадаў Афінаў засцерагліся, што стыхія можа дайсці да гораду і пакінулі свае дамы. Многія дарогі і іншыя магчымыя шляхі эвакуацыі былі заблакаваныя агнём.

Паводле інфармацыі Чырвонага Крыжа, у двары адной з віл у прыморскай вёсцы Маці, якая знаходзіцца ў эпіцэнтры прыроднага бедства, былі знойдзены целы 26 дарослых і дзяцей. Ратаўнікі сведчаць, што людзі абдымалі адзін аднаго на момант смерці.

UPD. Еўразвяз абвясціў 25 ліпеня днём жалобы. Цягам дня перад усімі рэзідэнцыямі ў Еўраквартале будуць прыспушчаныя сцягі.

Як заявілі ўчора ў Міністэрстве замежных спраў Беларусі, сярод пацярпелых ад пажараў у Грэцыі няма беларускіх грамадзян.

***

Цяперашнія лясныя пажары ў Грэцыі – самыя моцныя з 2007 года. Тады на поўдні Пелапанэскага паўвострава загінулі дзясяткі чалавек.

Урад Грэцыі звярнуўся да іншых еўрапейскіх краін з просьбай дапамагчы з пажарнымі і верталётамі. Некалькі краін, у тым ліку Італія, Польшча і Францыя, накіравалі ў Грэцыю пажарную авіяцыю, тэхніку і ратавальнікаў.

Глядзі таксама
Каментары