Ля мэрыі Харкава ўзброены нападнік забіў паліцыянта (Відэа)

ВІДЭА

Перастрэлка ў Харкаве

Ноччу невядомы учыніў страляніну побач з будынкам Гарадской рады Харкава.

Ён стрэліў у ахоўніка мэрыі і параніў яго, а таксама ў паліцыянта, які пазней памёр у больніцы.

Пра гэта паведамляе прэс-служба Нацыянальнй паліцыі Украіны ў Харкаўскай вобласці.

«Узброены мужчына адкрыў агонь па паліцыянтах і параніў аднаго з праваахоўнікаў. Патрульныя ўжылі табельную зброю і абясшкодзілі зламысніка. Ад атрыманага ранення патрульны памёр у больніцы», – гаворыцца ў паведамленні прэс-службы Нацпаліцыі.

Інфармацыя пра тое, што чутныя стрэлы, паступіла ў паліцыю а 00:37. Праваахоўнікі, якія прыбылі на месца, пабачылі параненага ахоўніка, побач стаяў мужчына, які пачаў страляць па патрульных.

Суполка ў «Facebook» «Харьков. Live» са спасылкай на відавочцаў паведамляе, што перад тым, як зайсці у будынак мэрыі, нападнік зрабіў каля дзесяці стрэлаў у дзверы і параніў ахоўніка.

Адзначаецца, што пазней злачынца быў забіты на вуліцы.

НМ, belsat.eu, паводле Уніан

Глядзі таксама
Каментары