Кіраўнік Беларусі 14 лютага наведвае Светлагорскі цэлюлозна-кардонны камбінат і пабудаваны на яго базе завод сульфатнай беленай цэлюлозы.
Аляксандр Лукашэнка пацікавіўся, ці вырашаныя ўсе экалагічныя пытанні пры стварэнні новай вытворчасці.
«Дрэннага паху няма?» – спытаў ён, паведамляе прэс-служба кіраўніка дзяржавы.
Старшыня канцэрна «Беллеспаперапрам» Юрый Назараў запэўніў, што праблем няма. Паводле яго, інакш бы не падпісалі акту ўводу прадпрыемства. Назараў адзначыў, што завод уведзены ў эксплуатацыю, працуе і паступова выходзіць на праектную магутнасць.
Кіраўнік дзяржавы таксама цікавіўся схемай, па якой на прадпрыемства пастаўляецца сыравіна. У прыватнасці, ён даручыў, «каб праблема дастаўкі балансавай драўніны была вырашаная сёлета».
Паводле яго, дадатковыя пастаўкі драўніны на перапрацоўку на Светлагорскі ЦКК дадуць магчымасць больш эфектыўна выкарыстоўваць лясныя рэсурсы краіны і перапрацоўваць «наша багацце» «ў паперу, цэлюлозу, каб не вазіць за мяжу за бясцэнак».
Дамова з кітайскай карпарацыяй САМСЕ на будаўніцтва заводу была заключаная ў кастрычніку 2010 года, агульны кошт праекту па будаўніцтве заводу складае каля $ 850 млн.
Завод беленай цэлюлозы, пабудаваны ў межах беларуска-кітайскага праекту, пачаў працаваць у пачатку 2018 года. Але яшчэ да пабудовы заводу мясцовыя жыхары сабралі больш за 10 тысяч подпісаў супраць прадпрыемства. Эксперты звярталі ўвагу на нізкую якасць вытворчага працэсу і экалагічныя негатыўныя наступствы. Пасля запуску вытворчасці навакольныя жыхары пачалі цярпець ад стойкага смуроду.
Летась у траўні будаўніцтва заводу ў Светлагорску праінспектаваў прэм’ер-міністр Беларусі Сяргей Румас і паскардзіўся на кітайскіх падрадчыкаў, якія зацягваюць будаўніцтва і парушаюць інструкцыі. У тым ліку, кіраўнік ураду прызнаў, што на светлагорскім заводзе сёлета абваліўся дах. Пра намер скасаваць кантракт з кітайцамі на камбінаце заявілі 2 жніўня.
У выніку было вырашана, што Светлагорскі цэлюлозна-кардонны камбінат завершыць рэалізацыю кітайскага інвестыцыйнага праекту па будаўніцтве заводу сульфатнай беленай цэлюлозы самастойна, з прыцягненнем беларускіх падрадчыкаў.
МГ belsat.eu