Аляксандр Лукашэнка агучыў запрашэнне кіраўнікам іншых дзяржаваў прыехаць у Менск на парад 9 траўня. Пра гэта паведамілі ў ягонай адміністрацыі.
«Публічна запрашаю кіраўнікоў дзяржаў, хоць бы былога Саюзу, прыехаць у Менск», – сказаў кіраўнік Беларусі, наведваючы 5 траўня Аб’яднаны інстытут машынабудавання НАН Беларусі.
Паводле яго, «правільна было б сабрацца ў Менску», бо Беларусь – «гэта самая пацярпелая рэспубліка – жывы помнік вайне».
Каментуючы негатыўную рэакцыю на рашэнне правесці парад падчас пандэміі каронавіруса, ён заявіў пра неабходнасць рэагаваць на яе: своечасова, мэтанакіравана і адэкватна.
Нагадаем, Лукашэнка абвесціў, што не збіраецца адмяняць парад да Дня Перамогі, нягледзячы на эпідэмію каронавірусу. На яго думку, парад «ніяк не паўплывае на здароўе нашых людзей».
МГ belsat.eu
