Старшыня Савету Рэспублікі Наталля Качанава паведаміла, што Аляксандр Лукашэнка вырашыў захаваць Грушаўскі сквер. Пра гэта піша БелТА.
«Кропка ў гэтым пытанні пастаўлена на самым высокім узроўні», – падкрэсліла Качанава.
Па даручэнні Лукашэнка спікер Савету Рэспублікі, якая таксама зʼяўляецца ўпаўнаважаным кіраўніка дзяржавы па горадзе Менску, сустрэлася з адміністрацыяй Маскоўскага раёну, забудоўнікамі і мясцовымі жыхарамі, уважліва выслухала ўсе пункты гледжання і аргументы бакоў.
«Я паведаміла кіраўніку дзяржавы, як развіваецца сітуацыя, і ён прыняў рашэнне, што Грушаўскі сквер павінен быць захаваны. Забудова і добраўпарадкаванне будуць весціся так, каб ён ні ў якім разе не пацярпеў. Прэзідэнт надае вялікую ўвагу пытаннях экалогіі, асабліва актуальная гэтая тэма для такога мегаполіса, як Менск», – распавяла Качанава.
Летась стала вядома, што дрэвы ў Грушаўскім скверы збіраюцца высякаць, а на іх месцы плануюць пабудаваць жылы дом на некалькі пад’ездаў. План забудовы выклікаў абурэнне жыхароў менскага мікрараёну Грушаўка.
Каб захаваць сквер, яго абаронцы ладзілі розныя акцыі, а таксама запісалі зварот да Лукашэнкі. У звароце падкрэсліваецца, што за апошнія 2 гады сквер паменшылі амаль на чвэрць – з 2,16 га да 1,72 га. Плошча азялененых тэрыторыяў ужо зараз у 7,5 раза ніжэй за норму. За 10 гадоў у Грушаўцы пабудавалі 600 тыс. кв. м жылля, але ніводнага сацыяльнага аб’екту. Нормы шчыльнасці насельніцтва ды нормы паркоўкі парушаныя, гаворыцца ў звароце.
ІІ belsat.eu