Аляксандр Лукашэнка 24 снежня падчас нарады па актуальных пытаннях супрацы з РФ заявіў, што больш не называе Расею «братняй дзяржавай».
«Я ўжо не кажу брацкай дзяржавай, таму што, як мяне інфармуюць, у Расеі гэта не ўспрымаецца. Нібыта прыйшлі новыя людзі, для якіх гэтае паняцце непрымальна. Што ж, будзем партнёрамі», – заявіў ён, паведамляе прэс-служба кіраўніка краіны.
Лукашэнка адзначыў, што Расея для Беларусі з’яўляецца ключавым партнёрам. Ён падкрэсліў «значнасць гэтага ўзаемадзеяння» і дадаў, што па ўсіх пытаннях дамоўленасцяў з РФ рашэнні прынятыя.
«І на вышэйшым дзяржаўным савеце, і на саюзным Саўміне, і ў двухбаковым фармаце падпісаны многія пагадненні. На жаль, як я часта кажу, яны не ўсё выконваюцца», – сказаў Лукашэнка.
25 снежня ў Маскве Лукашэнка і Пуцін правядуць перамовы з удзелам урадаў дзвюх дзяржаў. На парадку дня – пытане кампенсацыі ад падатковага манеўра і паглыбленне інтэграцыі.
КА, belsat.eu