Кіраўнік Беларусі сваім указам № 468 зацвердзіў Дзяржаўную інвестыцыйную праграму на 2020 год. Пра гэта паведамілі ў прэс-службе Аляксандра Лукашэнкі.
На фінансаванне 107 аб’ектаў у 2020 годзе плануецца накіраваць Br581 млн.
Намечана пачаць фінансаванне будаўніцтва ды рэканструкцыі крытай лядовай пляцоўкі і аўтавакзала ў Астраўцы, сярэдняй школы і інтэрнату Нацыянальнага дзіцячага тэхнапарку, дзіцячых садкоў у Менскай вобласці, храму Аляксандра Неўскага на Вайсковых могілках у Менску, цэнтру медычнай рэабілітацыі воінаў-інтэрнацыяналістаў у Віцебску, моста праз Заходні Буг на трасе Р94 Берасце – мяжа Польшчы, 7 жылых дамоў для семʼяў з дзецьмі-сіротамі.
Завершыцца будаўніцтва і рэканструкцыя раённай больніцы, цэнтру творчасці моладзі ў Астраўцы, школы Нацыянальнага дзіцячага тэхнапарку ды цэнтру бяспекі МНС у Менску, спартыўна-культурнага цэнтру Беларускага дзяржаўнага ўніверсітэту культуры і мастацтваў, дзвюх паліклінік у Гомлі, рэспубліканскай гімназіі-каледжу Беларускай дзяржаўнай акадэміі музыкі, Свята-Успенскага манастыра ў Жыровічах і іншых абʼектаў.
МГ belsat.eu
