Французскі актор і вінароб Жэрар Дэпардʼё, двойчы пабываў у Беларусі і падчас аднаго з візітаў выказаў намер пажыць у нашай краіне «сярод сялянаў». І вось цяпер, як паведамляе TUT.by, актор атрымаў участак у вёсцы Лапаравічы.
Апошні раз з візітам у нашай краіне Жэрар Дэпардʼё быў у лістападзе 2017 году. Тады ён наведваў Менскі завод вінаградных вінаў. На ноч актор спыняўся ў вёсцы Лапаравічы і нават збіраўся сустрэцца з кіраўніцтвам Папярнянскага сельсавету для абмеркавання нейкага пытання, пісала тады «Камсамолка».
«Актор прасякнуўся сімпатыяй да нашай краіны і выказаў жаданне пабудаваць тут дом. Паводле даручэння кіраўніка дзяржавы Жэрару Дэпардʼё быў выдзелены ўчастак у вёсцы Лапаравічы. Можна сказаць, што цяпер яго мара збудзецца», – распавяла Святлана Ракецкая, супрацоўніца Папярнянскага сельскага выканаўчага камітэту.
Паводле выпісу з Адзінага дзяржаўнага рэгістру нерухомай маёмасці, у вёсцы Лапаравічы згодна з рашэннем Папярнянскага сельскага выканаўчага камітэту № 180 ад 26 сакавіка 2019 года сапраўды быў выдзелены зямельны ўчастак на 0,1500 га для для будаўніцтва і абслугоўвання жылога дому.
Дамова арэнды на гэты ўчастак у той жа дзень, 26 сакавіка, падпісана паміж Папярнянскага сельскім выканаўчым камітэтам і грамадзянінам Расеі, які пражывае ў Саранску, Жэрарам Ксаўе Дэпардʼё на 99 гадоў. Гадавы кошт арэнды – 132,96 рублі.
Участак Дэпардʼё знаходзіцца ў Лапаравічах па вуліцы Спартовай. Суседзямі французскага актора сталі Дарʼя Домрачава і яе трэнер Адрыян Цыбульскі.
Дэпардʼё лічыць сябе грамадзянінам свету. У 2012-ым ён адмовіўся ад французскага грамадзянства, а ў 2013 годзе атрымаў расейскае.
У нашай краіне ён быў двойчы. У ліпені 2015 года па запрашэнню Лукашэнкі наведаў Астрашыцкі гарадок. Тады кіраўнік Беларусі навучыў Дэпардʼё касіць траву.
У лістападзе 2017 году актор наведаў Менскі завод вінаградных він. Вясной 2018 году разам з беларускім вытворцам ён распрацаваў новую марку напою. Што праўда, яго не прадаюць у беларускіх крамах.
У інтэрвʼю выданню Le Figaro TV Magazine актор казаў, што не супраць пажыць і ў Беларусі.
СК belsat.eu