Кіраўнік Беларусі, наведваючы 6 верасня Берасце, выказаўся адносна будаўніцтва ў горадзе акумулятарнага заводу, супраць якога пратэстуюць мясцовыя жыхары. Пра гэта паведамілі ў прэс-службе Аляксандра Лукашэнкі.
Кіраўнік дзяржавы адзначыў, што ён «у дадзеным выпадку на баку людзей». Паводле яго, праверыўшы інфармацыю аб праблемах, звязаных з будаўніцтвам заводу АКБ, ён убачыў, што «людзі, якія перажываюць за экалогію, сваё жыццё, жыццё дзяцей, у асноўным маюць рацыю».
«І я ўбачыў правапарушэнні – з боку і асобных дзяржаўных служачых, і асобных дзялкоў, якія паабяцалі пабудаваць, па шчырасці, патрэбны нам аб’ект», – расказаў Лукашэнка.
Кіраўнік дзяржавы адзначыў, што «жорстка даручыў адпаведным службовым асобам заняцца гэтым пытаннем». Зараз некалькі чалавек затрыманыя, астатнія – кінуліся наўцёкі.
Лукашэнка таксама дадаў, што калі акумулятарны завод у Берасці будуць уводзіць у строй, ён павінен адпавядаць усім экалагічным стандартам.
Пры гэтым ён загітаваў берасцейцаў не падтрымліваць тых, хто «хоча палітычна пагрэць рукі: ужо ўладу мяняць будуць, бо завод дрэнны».
«Я хачу, каб мудрыя, адукаваныя, разумныя берасцейцы разумелі, што яны выкарыстоўваюць любую нагоду для таго, каб прарвацца ва ўладу», – сказаў кіраўнік дзяржавы.
Пратэст супраць будаўніцтва (а пазней – увядзення ў эксплуатацыю) акумулятарнага заводу ў прадмесці Берасця стаў адным з самых працяглых у беларускай гісторыі. Людзі пачалі штонядзелі выходзіць на цэнтральную плошчу гораду ажно ў студзені 2018-га: актывістаў рэгулярна затрымлівалі, давалі ім штрафы, а супраць некаторых нават распачыналі крымінальныя справы.
Сёлета напрыканцы чэрвеня паводле абвінавачвання ў карупцыі затрымалі Віктара Лемяшэўскага – ўласніка «1АКGroup», куды ўваходзіць «АйПаўэр» (якой і належыць завод). Завод нібыта закрыўся, так і не распачаўшы працу. Аднак берасцейцы працягваюць ладзіць вулічныя акцыі.
МГ belsat.eu
