Падчас наведвання Карэліцкага раёну Гарадзенскай вобласці Аляксандр Лукашэнка распавёў, што ягоны падарунак прывёў у захапленне Мэланію Трамп. Пра гэта паведамляецца ў сюжэце ОНТ.
«Мы ўмеем добрыя тканіны рабіць. Я нядаўна жонцы прэзідэнта ЗША перадаў вырабы з ільну. Яны ахкаюць і вохкаюць, пытаюцца, дзе гэта можна купіць. Гэта кажа аб тым, што мы не ўмеем прадаваць свой тавар. Прыйдзецца вучыць тых, хто павінен гэтым займацца», – заявіў Лукашэнка.
Нагадаем, падчас візіту дарадцы прэзідэнта ЗША па нацыянальнай бяспецы Джона Болтана ў Менск 29 жніўня Аляксандр Лукашэнка папрасіў перадаць падарункі для амерыканскай прэзідэнцкай пары.
Доналду Трампу Лукашэнка перадаў корцік. У якасці падарунка для Мэланіі Трамп былі абраныя вырабы з беларускага лёну.
«Перадайце гэта Мэланіі, бо яна мае адносіны да славянскага ільну (жонка Трампа славенскага паходжання – заўв. belsat.eu)», – каментаваў Лукашэнка свае падарункі.
ІІ belsat.eu
