Кіраўнік Беларусі Аляксандр Лукашэнка 18 красавіка на сустрэчы з кіраўніком Дубайскага міжнароднага фінансавага цэнтру Эсой Казімам і ягоным выканаўчым дырэктарам Арыфам Аміры заявіў пра сваю зацікаўленасць у досведзе гэтага цэнтру.
«Мяркую, што вы ўжо знаёмыя з нашымі марамі: стварыць нешта падобнае вашаму цэнтру ў Беларусі», – сказаў Аляксандр Лукашэнка, паведамілі ў Адміністрацыі кіраўніка Беларусі.
Ён паабяцаў быць вельмі ўдзячным, калі МФЦ працягне «сваю дабрачынную дзейнасць у Беларусі ў плане падтрымання гэтага праекту і кансультацыйнай дапамогі». «Калі б мы здолелі знайсці агульную цікавасць, дык гэта спалучэнне было б толькі на карысць развіццю лічбавай эканомікі», – падкрэсліў ён.
У сваю чаргу Эса Казіма паведаміў, што і МФЦ, і ўрад Дубаю абавязваюцца падтрымліваць праект у Беларусі.
«Не думаю, што гэта проста мара. Гэта нешта, што мы вельмі хутка рэалізуем», – заявіў ён.
Дубайскі міжнародны фінансавы цэнтр з’яўляецца адмысловай эканамічнай зонай у ААЭ, якая была заснаваная ў 2004 годзе, і фінансавым хабам для рынкаў Блізкага Усходу, Афрыкі і Паўднёвай Азіі. Прэзідэнтам МФЦ ёсць спадчынны прынц Дубаю.
МГ belsat.eu