Кіраўнік Беларусі 13 верасня правёў перамовы са спадчынным прынцам Абу–Дабі, намеснікам Вярхоўнага галоўнакамандуючага Узброенымі сіламі Аб‘яднаных Арабскіх Эміратаў, шэйхам Мухамадам бін Заідам ан–Наг’янам.
Падчас размовы Аляксандр Лукашэнка прызнаўся, што хоць арабскі прынц упершыню наведвае Беларусь з афіцыйным візітам, наша краіна для яго не чужая. Паведамілі ў прэс-службе беларускага кіраўніка.
«Тым больш у Вас тут свой дом», – дадаў ён.
Па словах кіраўніка Беларусі, яго з Мухамадам бін Заідам звязваюць сяброўскія адносіны. Няма праблемаў або спрэчных пытанняў і ў стасунках паміж краінамі. Лукашэнка выказаў спадзеў, што візіт прадстаўніка ААЭ ў Беларусь надасць сурʼёзную дынаміку ў гандлёва-эканамічным, інвестыцыйным дачыненні.
У Лагойскім раёне знаходзіцца ўчастак Абʼяднаных Арабскіх Эміратаў, які займае плошчу 3210 гектараў. Участак прызначаны для будаўніцтва і эксплуатацыі рэзідэнцыі, паляўнічых вальераў, штучных вадаёмаў, паляўнічых домікаў і абʼектаў, неабходных для іх абслугоўвання, а таксама абʼектаў інжынернай і транспартнай інфраструктуры.
Гэтая зямля ў 2014 годзе перададзена ААЭ ў арэнду на 99 гадоў. Гадавая арэндная плата з 2018 года складае Br 885 583,59.
МГ belsat.eu