Праект новай Канстытуцыі Беларусі можа быць гатовы да канца 2021, яго лёс людзі вырашаць на рэферэндуме, заявіў Аляксандр Лукашэнка ў інтэрв’ю праграме «Дзейныя асобы з Наілей Аскер-задэ» на тэлеканале «Россия 1».
Ён удакладніў, што «папраўкі ў Канстытуцыю, можа быць, калі дэлегаты будуць гатовыя да гэтага, будуць пазначаныя [на сходзе], а ўнясенне іх будзе выключна на рэферэндуме», тэрміны якога гэтак сама абвесцяць на сходзе.
«Думаю, што цягам года мы зможам распрацаваць праект новай Канстытуцыі, – працягваў Лукашэнка. – І думаю, што да канца наступнага года праект новай Канстытуцыі будзе гатовы. І тады на рэферэндуме людзі вызначаць, быць новай Канстытуцыі ці не быць».
Пры гэтым ён адмовіўся «прыадкрыць заслону таямніцы» адносна таго, якія новаўвядзенні мяркуецца ўнесці ў Канстытуцыю. «Не, я не магу цяпер яе прыадкрыць, бо да канца не сфармаваныя асноўныя прапановы аб змяненні. Гэта па-першае, – сказаў Лукашэнка. – Па-другое, я абазначаў некаторыя: аб пераразмеркаванні паўнамоцтваў, аб партыйным будаўніцтве. Гэта палітычныя пытанні. У эканоміцы мы пакінем прапанову, каб у нас была сацыяльна арыентаваная дзяржава».
ІК, belsat.eu